96 - Sciroeu de Milan

Continua da pag. 13 - L’ETAA DE L’ÒR
Questi hinn i penser de la Rina che, intratanta, l’è rivada
al sportell de doe l’inonda el fumm de la sigaretta de la
sparpiattola che la ghe slonga, ruspana (con de quij man
mal tegnuu… i did giald de nicotina), la ghe slonga quij
quatter parpaj che la sa mai come faj stà assee.
“Che la me spetta, ’dess tocca a mì, e che la tegna-nò
i danee rotolaa in man… vegni”, el ghe dis el Carlo
boffandegh in l’oreggia, e a lee ghe riva, mes’ciaa a
la spuzza de la sigaretta de l’impiegada, on profumm,
on savor bon de dòpo-barba, de marca bònna, de sicur,
lee se n’intend.
E de colp la se sent come on’onda de nostalgia, la voeuja
de on para de brasc fòrt… oh!, domà per pondass!
Ossignor! Còssa ghe ven in ment? La se varda intorna
per vess sicura che ’sto penser el ghe sia minga scappaa
foeura del coo e magari ciappà còrp in sù la faccia
d’on quajghedun de la fila!
El cafè l’è pròppi bon. De on quart d’ora la Rina la
scolta volentera el Carlo, che ghe le cunta-sù soave,
con la confidenza de tanti ‘apontament’, se fa per dì,
ai sportej de la pension.
E inscì, ona paròla tira l’altra, salta-foeura che lù el viv
indeperlù in d’on local cont i servizii, visin a la tosa
sposada… ona nevodina… “la varda ’me l’è bella!”,
e lee la tira-foeura an’lee la fotografia di sò trii nevod,
e ghe se string el coeur al penser de la noeura… già la
noeura!
Mai ona volta che la ghe disa de vegnì a godes ’sti trii
patanitt, domà quand la gh’ha bisogn!
Ghe ven in ment quand el sò fioeu ghe l’aveva presentada:
on stramoscin senza dennanz né dedree… ma còssa
mai el gh’avarà trovaa in quell manich de scoin lì?
Lù inscì bell, grand e ben pientaa.
Anca la soa sorella Elsa l’era sbrottada: “Ma tì, te lasset
ch’el tò fioeu el toeuva per miee quell ferma-antipòrt
lì? Ona morgnina che la sa né de tì né de mì!”.
Eh nò! Adess l’è tròpp! Se el sò Gianni l’aveva cattaa-foeura
quella-lì, le saveva lù el perchè, e la Elsa la
gh’aveva nò el diritto de parlagh adree in quella manera
lì.
Puttòst, l’aveva tentaa de parlaghen lee al Gianni, ma,
odèss, gh’era staa nient de fà.
A ’sto penser la Rina la scorliss el coo, tant ch’el Carlo,
premoros: “L’è fòrsi minga bon el cafè?”.
“Nò nò, l’è bonissim”, intratant che l’osserva ’sto
òmm, rangiaa-sù polito, cont on bell para de scarp.
“Già, i scarp” - el fa lù - “che la se figura che i hoo
22 Sciroeu de Milan - Marz/April 2013
ACCADEMIA
vist foeura in cors Venezia a on prezzi spropositaa! Ma
siccome al mè gener, ch’el lavora in la pubblicità, ghi
hann daa de omagg, combinazion hinn del mè numer
e minga del sò…”.
- Par infina ch’el voeura scusass de parì quell che l’è
nò. Che persona per ben! - Foeura del bar fann quatter
pass fina al supermercaa, vann denter e lù el ghe ruzza
dennanz el carrellett. La podarìa toeu nient per el fatto
che la gh’ha de stà bottonada in d’el spend, e ormai
la spesa l’ha fada, ma tant per minga fass toeu via, la
mett in del cestin on pacchett de biscòtt e on vasett de
mel… intratant che la ghe ven adòss masarada.
Tutt quell ben de dio, la musica, i color, i lus de le ‘offerte
speciali’, ghe fann vegnì in ment i sò duu locaj a
equo canone ch’hinn “in vendita”… che lee la podarà
mai compraj e che chissà in doe l’andarà a finì.
La pessega a voltà-via el coo e cont el did la scorlissvia
ona lagrimetta del canton de l’oeucc.
Par che tutt el sia lì a portada de man per mangià e bev in
compagnia e in alegria, e lee, inveci, semper pussee solla…
Foeura del ‘super’ ’me fudessen d’accòrd, s’invien a i
giardinett, la banchetta, anmò quatter ciaccer e quand
se lassen l’intesa l’è de trovass-lì, el dì dòpo, “…o se
nò, podarissom andà al cinema”, el fa lù. “E perchè
nò?” - la ghe rispond, e denter de lee la tenta de regordass
l’ultima volta che l’è andada al cinema e per
gionta compagnada d’on òmm!
A pòcch a pòcch la Rina la torna a gustà el piasè d’ona
pòrta averta per lassalla passà, d’ona man per andà in
sù l’autobus, la se mett pussee in ordin, la derva perfina
ona boggetta de profumm de chissà quanti ann fa,
ma bon anmò, e lù el riconoss la marca.
Torna anmò el dì de la fila ai sportej de la pension.
Quand vegnen foeura, lù le ciappa a brazzet e senza
tegnì cunt di domand de lee, le mèna in sù ’l cors lì
arent in d’ona agenzia de viagg.
“7 giorni a Palma di Majorca per 2 persone nell’età
dell’oro”, e lù el ghe sprofonda-lì asquas tutt i sò danee
de la pension, intratant che la Rina, a momenti
senza fiaa, la ghe farfoja:
“E dòpo?”.
“Dòpo, on quaj sant provvederà!”.
Foeura, in sù ’l marciapee, a la Rina ghe par de vess in
gondola, a lù ghe sberlusen i oeucc, el rid ’me on bagaj
a l’ultim dì de la scòla.
Se ciappen per man: in de ’l coeur de tutt e duu on,
soeuja-mì, de dolz, de mòrbid, de quiett mai provaa, o
fòrsi nò, domà desmentegaa.