96 - Sciroeu de Milan

Fontane di Milano
da “Fontann de Milan, pozz, laghett e sbilz d’acqua” di Ella Torretta
FONTANA LIBERTÀ - PAS - CIVILTÀ
Per comincià ve presenti ona moderna e stramba
fontana che in d’ona giornada d’inverno, intant che
ghe passavi arent, hoo sentii che la sospirava...
“sòtt’a la luna d’argent, la nòtt freggia la m’ha gelaa
el vestii e son diventada ona cascada de giazz!”
L’è òpera de l’Arch. Andrea Cascella su progett de
l’Arch Tartaglia.
La se troeuva in Piazza Leonardo da Vinci - Città Studi.
L’è stada inaugurada el 4 de magg del 1985, dopo
40 ann da la 2° Guerra Mondial, “Dedicata alle idee
di libertà, alla pace, alla civiltà di tutti i popoli”...
anca de quei che, pòcch civilment, de spess l’hann
spegasciada!
Purtròpp dòpo ona settimana l’aveven giamò
smorzada, perchè la manutenzion la costava tròpp al
Comun de Milan.
In de sti ann la funziona domà... quand vanzen i danee...
se de nò la tas!
FONTANA CORTI BAIRES
Per chi voeur passà ona giornada a Milan a comprà
anca quell che l’è minga necessari, el pò andà in Cors
Buenos Aires, dove ona quantità de bottegh soddisfen
ògni esigenza di turista.
Per questa gent, hinn nassuu le “Corti Baires”.
In d’ona giornada d’estaa l’è bell trovass cont on’amisa,
setass in tranquillità denanz al tavolin d’on bar per
gustà on sorbett e cicciarà del pù e del men.
Oppur, se te see de per tì, restà in ammirazion d’ona
fontana che rinfresca l’aria e scoltà
La canzone che l’acqua racconta da sempre