copione - Silveria Gonzato

34
Carla:
Su, Reverendo, l’è par la so salute! Sa fai i só parochiàni se lu el se cùcia?
D. Alceste:
La me scusa, sióra Carla, ma in sto momento no pól interessàrmene de manco.
Iolanda:
Don Alceste, no ‘l staga far come le creature. Se no ‘l se cura i cervicali, ghe vien mal
de testa e anca le stornìsie, No se lo ricòrdelo più el rugolón che l’à fato zo da l’altàr
par i giramenti de testa? S’el batéa ‘na tempia, el ghe restàa séco.
D. Lumìn:
Ma g’ala da fàrghela nel brasso o nel dedrìo? Mi no l’ò gnancóra capìo. Nel brasso va
ben, ma in quel’àltra parte nò, piutòsto la morte. Tien duro, don Lumìn! Ma in sto paese,
no ghe n’è mia òmeni che sàpia far le pontùre? A mi el me le faséa el Tano. Indoe élo
andà a finìr el Tano?
D. Alceste:
Basta! Mi de pontùre no ghe ne vói più, specialmente da ‘na dòna.
Carla:
Oh! Èlo par quel? El se figura che efèto ch’el me fa el so dedrìo! Far le pontùre l’è el
me mestiér e ghe assicuro che tra el so fondoschéna e quel de la Iolanda no gh’è
nissùna difarènsa.
D. Lumìn:
La g’à da fàrghela proprio in quel posto!....L’è ‘n scandalo!
Iolanda:
E così el me….el me cóso l’è come quel de ‘n prete!....No l’avaréa mai dito!
D. Alceste:
Se in tuti sti giorni l’à insistìo, contro la me volontà, de vegnérme a far le pontùre, par
dopo dirme che ghe soméio a la Iolanda….Quéla l’è la porta!
Carla:
Ma, Reverendo, sa alo capìo? El varda che mi no ò mai visto gnénte, són sempre stà
discreta….Si e nò che g’ò visto un centimetro quadrato de pèle…L’è come se g’avésse
visto quéla de la fàcia.
D. Alceste:
De ben in mèio! Donca mi g’avaréa la fàcia da…..Bóca tasi!
Carla:
Ma, Reverendo, lu el se stà diséndo tuto da solo!...El varda che la fialéta l’ò za
róta….qua svaporìsse tuto!
34