entra - Cralportotrieste.com

EL SAVOR
El pol piaser… No’l pol piaser…
Ve assicuro, sul mio onor,
che, de quando iero picia,
vado mata pel savor!
Chi ghe meti anche i pignoi
E chi l’uva sultanina.
Mi lo fazo drio riceta
De mia nona Caterina.
Ai sardoni e ale sardele,
e anche a un picolo scombreto,
mi ghe cavo testa e coda
e benissimo li neto.
Li infarino e po’ li frizo
e li meto ben a scolar,
po’ li stivo in piadinela
e continuo a cusinar,
in un bel bicer de oio,
una punta de farina
e ghe zonto un bel muceto
de zivola fina, fina.
Co se cala la zivola,
zonto un aio e rosmarin,
sal e pevere e asedo
(poco più de un bicerin).
Zonto anche poca aqua
E ghe dago a tuto un boio
E po’ buto tuto quanto
Sora el pese frito, e smoio
per almeno diese ore,
ben in fresco e, sul mio onor,
se gavè dosà ben tuto,
sentirè che bon savor!
PESCADORA
Sfilandose dal suro, tesa, tesa,
la togna fila svelta verso el fondo.
El piombo la strassina nel profondo.
Eco! La toca! Longa xe l’atesa.
Cossa sta sucedendo in fondo al mar
adesso che la morte xe rivada
atorno al amo strenta, camufada
de bocon gialo pronto per magnar?
Imagino la corsa che fa i pessi,
no savendo che un diese metri in sora,
su l’orlo de una barca xe una siora
che pensa: Eco, adesso mi volessi
che soto acqua rivassi un bel branzin
e che’l ingiotiria la mia esca.
Xe pronto za un secio de aqua fresca
che speta, int’ela barca, in cantonzin.
Sarà una liba, un sparo, un molo bianco,
un scombro, un angusigolo o un guato
el pesse che, sbattendo come un mato,
riverà in barca spaventado e stanco?
Sarà un pesson? Sarà forsi un pesseto?
El magnerà el pedocio, el fiol d’un can?
Spetando se informigola la man.
La movo pian e zuco su un pocheto.
Eco un becon! La man zuca un tantin
el fil de nailon in su … Beca de novo!
Dago un straton; stavolta svelta movo
La man per tirar su el mio … branzin!
Ferindose, con l’amo nela boca,
tentando la sua ultima difesa,
un picio guato, pronto ormai ala resa
el fa pasion. In fondo al cuor el me toca.
Ghe salverò la vita. Pian lo movo.
Pian lo distaco per no farghe mal e,
sognando un grando, bel dental,
buto guatin e togna in mar de novo.
Concludo così, in bellezza, queste mie divagazioni, assolutamente estemporanee e peregrine,
augurando a tutti una buona estate e buone vacanze.