n evaluering van uitnemendheid binne welsynsorganisasies in die ...

2
Dit het tot gevolg dat welsynsorganisasies ‘n bestuursraamwerk benodig wat hulle
in staat stel om aan die nuwe eise te voldoen en werklik ‘n vervullende bestuursrol
in welsynsorganisasies te kan vertolk.
Die navorser stel totale kwaliteitsbestuur as ‘n bestuursfilosofie voor omdat hierdie
benadering rekening hou met elke aspek wat bestuurders moet hanteer en ook ‘n
kultuur van voortdurende groei, leer en verbetering skep (Oakland, 1995:173;
Jablonski, 1991:4; Besterfield, D.H., Besterfield-Micha, Besterfield, G.H.,
Besterfield-Sacre, 2003:5, Flood, 1993:74). Die beginsels van totale kwaliteitsbestuur
beantwoord ook aan die nuwe eise wat aan die bestuurders van
welsynsorganisasies gestel word.
Hierdie studie ontwikkel nuwe tegnologie vir die professie, aangesien daar
beperkte literatuur oor die implementering van totale kwaliteitsbestuur in welsynsorganisasies
met ‘n ontwikkelingsbenadering in Suid-Afrika bestaan. Daarteenoor
word totale kwaliteitsbestuur uitvoerig vir die bestuurswetenskappe en organisasie-ontwikkeling
as dissiplines beskryf.
Die beginsels van totale kwaliteitsbestuur as bestuursraamwerk word dikwels te
filosofies aangebied, is nie duidelik gestruktureer nie en dit konsentreer ook nie
genoeg op die meting van totale kwaliteitsbestuursinisiatiewe nie.
Die navorser bestudeer in hierdie studie alle nuwe ontwikkelings in totale
kwaliteitsbestuur. Die internasionaal aanvaarde Suid-Afrikaanse Uitnemendheidsmodel
word beskou as die beste gestruktureerde metingsraamwerk vir totale
kwaliteitsbestuur. Die model het ontstaan uit internasionale modelle wat vir Suid-
Afrikaanse omstandighede aangepas is. Die Suid-Afrikaanse Uitnemendheidsmodel
struktureer die beginsels van totale kwaliteitsbestuur in ‘n holistiese raamwerk
en bied selfassessering as metingsmetode aan organisasies. Hierdeur kan
organisasies hulle sterk en swak punte identifiseer en hulle algehele prestasie as
gevolg van die uitnemendheidsraamwerk verbeter.