n evaluering van uitnemendheid binne welsynsorganisasies in die ...

8
• Totale kwaliteitsbestuur kan grootliks bydra tot suksesvolle fondsinsamelings
aangesien dit die befondser gemoedsrus verskaf;
• Totale kwaliteitsbestuur is in ooreenstemming met die beginsels van die
ontwikkelingsbenadering en die beleidsrigting van die regering wat op dienslewering
gemik is.
• Totale kwaliteitsbestuur is koste-effektief omrede dit talle besparings vir
organisasies meebring indien oneffektiwiteite uitgeskakel word;
• Totale kwaliteitsbestuur ondersteun die maatskaplike waardes;
• Deur die implementering van totale kwaliteitsbestuur word sukses deurlopend
met behulp van prestasieaanwysers gemeet. Die aanspreeklikheid van
welsynsorganisasies word hierdeur verhoog.
• Totale kwaliteitsbestuur vereis dat die bestuur hom tot die proses verbind en
dat sy betrokkenheid en bereidwilligheid om verbetering in die organisasie
teweeg te bring, aan alle belanghebbendes getoon moet word.
• Totale kwaliteitsbestuur rig die organisasie se doelwitte en moet in die strategie
ingesluit word.
Die navorser wys in hierdie studie op etlike leemtes in totale kwaliteitsbestuur,
waarvan die belangrikste twee die volgende is:
• Die holistiese aard van die bestuursbenadering veroorsaak dat die fokuspunte
te kompleks en ongestruktureerd voorkom;
• Die beperkte fokus op die meting van die impak van totale kwaliteitsbestuursinisiatiewe
word as ‘n leemte beskou.
Die internasionale beste praktykmodel, bekend as die uitnemendheidsmodel,
orden die konsepte van totale kwaliteitsbestuur in ’n raamwerk en verskaf
bepaalde metings wat die impak van kwaliteit bepaal. Die beginsels van totale
kwaliteitsbestuur wat bestuurders in staat stel om uitdagings die hoof te bied, en
wat die vermoë het om dit te meet, kom dus in die uitnemendheidsmodel voor. Dit
is waarom die navorser van mening is dat dit van groot waarde vir die welsynsberoep
kan wees.