n evaluering van uitnemendheid binne welsynsorganisasies in die ...

ii
OPSOMMING
Bepaalde uitdagings word vanweë die ontwikkelingsbenadering en ander makroomgewingsfaktore
in Suid-Afrika aan welsynsorganisasies gestel. Die bestuur van
hierdie organisasies moet dus aan die nuwe eise kan voldoen. Die eise omvat
aspekte soos die ontwikkeling en aanpassing van die organisasie se beleid en
strategie, die lewering van ‘n kwaliteitdiens deur ’n voorkomende benadering te
volg, die integrasie van die diens met ander verskaffers as deel van die
diensleweringsproses, die verkryging van befondsing, die bestuur van inligting, die
identifisering van beste praktyke en die uiteindelike versekering van die
organisasie se aanspreeklikheid. Die totale funksionering van welsynsorganisasies
word gevolglik deur die veranderinge beïnvloed. Bestuurders moet
die veranderinge nie slegs bestuur nie, maar moet ook verseker dat ’n kwaliteitdiens
gelewer word waarmee alle belanghebbendes tevrede is.
‘n Totale kwaliteitsbestuursraamwerk stel die bestuur van welsynsorganisasies in
staat om ’n kwaliteitdiens te lewer. Totale kwaliteitsbestuur is ’n holistiese
bestuursraamwerk en omvat alle elemente wat die funksionering van organisasies
bepaal. Hierdie bestuursbenadering het ten doel om ’n kultuur in organisasies te
skep wat op die verbetering van prosesse, mense, stelsels, spanwerk en die diens
ingestel is, sodat die kliënt en werknemers tevrede gestel word. Alhoewel
welsynsorganisasies geen winsoogmerk nastreef nie en dikwels met beperkte
hulpbronne moet klaarkom, word totale kwaliteitsbestuur aanbeveel om te
verseker dat beperkte hulpbronne optimaal benut word, fondse bekom word en ’n
kwaliteitdiens aan hulpbehoewendes gelewer word. Die bestuursraamwerk help
bestuurders om oneffektiwiteite te elimineer, mense by besluitneming te betrek,
individue en organisasies aan te moedig om fondse te verskaf en die gewenste
resultate te behaal. Totale kwaliteitsbestuur berus op belangrike beginsels, maar
dit misluk dikwels omdat die beginsels nie afgebaken en gemeet word nie.
Die uitnemendheidsmodel is ’n selfassesseringsraamwerk waarmee bepaal kan
word in welke mate die beginsels van totale kwaliteitsbestuur in organisasies
toegepas word en in watter mate dit die verlangde resultate tot gevolg het. Die
raamwerk verskaf beste praktyke ten opsigte van elk van die kwaliteitsbeginsels.