Dagstukkies - Reon Du Plooy

Sondag
3 Maart PAISLEY-KRUL
Die sirkel netjies in twee verdeel met so ’n paisley-
krul. Die een helfte swart met ’n klein wit kolletjie. Die
ander oorwegend wit met ’n swart kolletjie. Almal van
ons ken die Yin Yang. Bejeën die heidense teken met
agterdog. In antieke Sjinese filosofie beteken dit dat
daar twee komplimentêre magte in die heelal
bestaan. Yang verteenwoordig alles wat positief en
manlik is, terwyl Yin alles verteenwoordig wat
negatief en vroulik is. (Jammer, dames. Dit is mans
wat dit uitgedink het!). Volgens Sjinese filosowe is die
een nie beter as die ander nie. Beide Yin en Yang is
nodig om die geheel te vorm en ’n balans tussen die
twee skep die ideale omgewing.
Het jy al opgemerk dat elke positief ’n skootjie
negatief ook by het? Daardie swart kolletjie wat so
seer-oog daar sit. En elke negatief ’n skootjie positief.
Niks in hierdie wêreld is volmaak rein nie. Alias die
Sjinese, in elk geval.
Hoe kan ’n mens rein wees? Hoe kan ’n sterfling
onskuldig wees? Die mens is verdorwe. Die wêreld het
ontaard in iets pervers en onrein. So anders as wat die
Skepper bedoel het. Ek kan my natuur so maklik swaai
tussen die twee susters Yin en Yang. Ek is mos slim én
slinks. En meer kere as nooit is dit Yin wat sensueel
fluister. Yin wat met beloftes van ’n heuningsoet
uitkoms lok. Yin wat die stryd wen. Yin wat my in die
skuld dompel. En baie maal het ek die vermetelheid
om myself te troos met die minuskule stukkie Yang
wat in die Yin wegkruip. Daar is darem ’n stukkie goed
in my, Here. Kyk en wees trots!
Die verhewe Sjinese filosowe van ouds het nog nie mý
God ontmoet nie! Daar is een wonderlik
ondefinieerbare Wese wat verhewe is bo Yin en Yang.
’n Wese wat wél reinheid definieer. ’n Wese wat
volmaak goed is. En wat ’n wonderlike balans skep die
rein sirkel nie! Geen Yin in hierdie Yang! Geen Yin, om
die waarheid te sê! Rein en sondeloos balanseer Hy
met gemak die geheel van sy skepping in sy een hand
terwyl Hy my met die ander koester. Deur die rooi van
Sy bloed kan ook ék nou strewe na wit volmaaktheid.
Ongeëwenaard rein.
My gebed is dat my liefde opreg sal wees. Rein en
sonder vooroordeel. My gebed is dat ek alles wat Yin
Yang en wêrelds is sal verafsku. My gebed is dat ek sal
vasklou aan die wonderlike belofte van hoop wat daar
in my Here se volmaakte reinheid en goedheid is.
AMEN
9 Die liefde moet opreg wees. Verafsku wat sleg is en
hou vas aan wat goed is. (Romeine 12)
Hier is voorstellings van die wêreld en van God se beelde van reinheid en balans. Gesels saam oor wat die verskil
is en waarom God se beeld beter is.
Bid saam as gesin vir die wêreld se beeld van reinheid. Bid dat God julle sal gebruik om die wêreld ’n beter, reiner,
meer gebalanseerde plek te maak soos dit sy wil is.