Dagstukkies - Reon Du Plooy

KEN DIE VYAND
Hy was van die begin af ’n moordenaar. En hy staan nie
aan die kant van die waarheid nie, omdat daar geen
waarheid in hom is nie. Wanneer hy leuentaal praat, is
dit volgens sy aard, want hy is ’n leuenaar en die vader
van die leuen. (Johannes 8:44)
’n Middelslag mannetjie oortrek met lang, stekelrige,
swart hare. Geniepsige horinkies op die kop. Hoewe
waar jy voete sou verwag. ’n Gevaarlike vurk in die
hand. En natuurlik ’n vieslike stert. ’n Ware
aapskeloeder. Die duiwel van my kindertyd. Reg uit
die Sprokies van Grimm. Ek sou hom sien aankom.
Genoeg tyd om hard en aanhoudend om hulp te
skreeu. En as die engel in sy goue glorie verskyn, ’n
swart roetstof wat ruik na vrees en nederlaag.
Hmmm… Na ’n paar jaar op aarde is ek nou bietjie
slimmer. Eintlik ontnugter. Hy besoek my in ’n heel
ander kleed. Soms net ’n fluistering in die wind. Sagte
gedagtes van aanmoediging. Of miskien
ontmoediging. ’n Briesie wat sade van twyfel,
mismoedigheid en wanhoop fluister. En dikwels vind
hierdie sade ’n vrugbare lêplek in my siel. Hy kom
soms in die kleed van my eie gedagtes. En sy stem het
sterk oortuigingsvermoëns. Dit klink so al asof dit die
waarheid kan wees… Maar hy was en is en bly die
donker vader van die leuen. Boos en wispelturig. Daar
is geen waarheid in hom nie. Al kleur hy die
leuenkleed hoe mooi in. Hy saai angs, wanhoop,
ongeloof, vrees, moedeloosheid, haat,
onvergewensgesindheid, jaloesie. Alles wat boos is.
Wie is die Satan? Hy is ’n swart, hopelose boosheid
wat oor die donker vermoëns beskik om mense saam
met hom die afgrond in te trek. ’n Stuk negatiewe
energie. ’n Parasiet. Hy is ’n hartseer realiteit. En hy
teer op mense se ongeloof in God. Hy teer op die
vrugte van die sade van boosheid wat hy saai.
Sondag
10 Maart
Hy is die vyand en hy werk met ’n spesifieke,
weldeurdagte plan. 14 En geen wonder nie! Satan self
doen hom voor as ’n engel van die lig. (2 Korintiërs 11)
Satan en sy trawante het uit die hemel geval.
Uitgeskop. Tot op die aarde. Wat ’n plek om te land?
Ons sit nou met hom en moet leer om sy planne te
verstaan. Ons moet ons vyand ken!
Jesus Christus het hulle ontwapen en hul nederlaag in
die openbaar vertoon (Kolossense 2:15). Maar onkruid
vergaan nie. En veral nie onkruid wat verneder en
kwaad is nie. Christus se vernedering op aarde het vir
Hom oorwinning gebring. Maar Satan is nie tot iets
positiefs in staat nie. En definitief nie tot berou en
bekering nie. By hom het vernedering ’n ewige,
skryende behoefte aan wraak gebring. Wraak en
haat. En die uiterste bevrediging? Om soveel moontlik
aanhangers met hom saam te neem warmplek toe.
Die hel is ’n aaklige werklikheid waarmee ons almal
moet saamleef.
En steeds is daar selfs Christene wat sy bose bestaan
ontken! Ons moenie die duiwel onder elke bos
probeer uitkrap nie, maar ons moet die vyand ken! Sy
grootste moderne wapen is dat ons hom nie meer
sien nie. Hy het homself so in die wêreld ingewurm
dat hy deel geword het van ons daaglikse bestaan. Hy
is op ’n baie gerieflike plek. Hy het nes geskrop. Sy
mag het gegroei. Hy het verskans geraak in ons
lewens. In die dinge wat ons teëkom. Hy teer op
slegte dinge waarvan desensitasie een is. En veral die
desensitasie van Christene. Hy teer ook op paranoia
of vervolgingswaansin.
Hy is die GROOT oëverblinder. Die GROOT leuenaar.
Die GROOT versoeker.
Ken die vyand!
Niemand van ons wil te veel aandag aan die Satan gee nie. Maar dit is tog belangrik om iets te weet van hoe hy te
werk gaan hier op aarde. Gesels oor julle beeld van die duiwel en hoe hy werk in die wêreld. Ons moet hierdie
week aanhoudend bid dat God ons teen sy aanslae sal beskerm!