Handelinge van die Sinode 2003 - NG Kerk in Oos-Kaapland

VOORWOORD : HANDELINGE
VOORWOORD DEUR MODERATOR
Die NG Kerk in Oos-Kaapland bevind haarself tans, soos ook ander sinodes van die Kerk, in ‘n
oorgangstyd -
* ‘n Proses van strukturele rasionalisering het so vroeg as 1990 ‘n aanvang geneem, en tydens die
buitengewone vergadering van die sinode in Junie 2002 is ingrypende besluite ten opsigte hiervan
geneem - die plaaslike gemeente is volledig kerk, en die sinodale strukture bestaan ter wille van die
gemeente - om lg met navorsing visionerend te begelei, en namens die gemeentes die meerdere belange
te bestuur.
* ‘n Uiters belangrike ding het ook by Sinode 2002 gebeur : Ons het duidelik gesê dat ons niks meer,
maar ook niks minder, as één, heilige, algemene, Christelike kerk wil wees nie, die gemeenskap van die
heiliges. Hiermee het ons as sinode vir onsself, mekaar, en vir die wêreld gesê hoe ons onsself sien,
en hoe ons glo die Koning van die Kerk ons sien.
* Die pas afgelope Sinode 2003 het verdere spore getrap : Ons het onsself afgevra hoe die konteks of
omgewing waarbinne die Here ons as kerk geroep het lyk, en hoe ons op plaaslike gemeentevlak as sout
vir die aarde en lig vir die wêreld ‘n verskil kan maak. Ons het gehoor dat God ons as kerk geseën het
en steeds seën, sodat ons vir ander tot seën kan wees, en dat dit wat ons tradisioneel so dikwels as
verleenthede gesien het, eintlik wonderlike geleenthede is.
* Sonder omhaal van woorde het ons as Sinode 2003 onomwonde en eenparig gesê dat die eenheid van
die liggaam van Christus ons na aan die hart lê, en dat ons ons gaan beywer om uit te reik na die broers
en susters in die Familie van NG Kerke, sodat die kerke weer kan herenig.
Die Oos-Kaapse Sinode het homself hiermee op die pad van versoening en diensbaarheid geplaas. Hier -
tussen berg, Karoo en see, waar die Here ons geplaas het, en waar van die vroegste tye in die Suid-
Afrikaanse geskiedenis grensoorloë en byloorloë gevoer is, en vanwaar die Groot Trek sy begin gehad
het, en die sg struggle van die tweede helfte van die twintigste eeu sy oorsprong - hier wil ons die
Koninkryk bou, wil ons God se hande en voete wees, wil ons ons offers bring, en wil Hy ons in sy liefde
meeneem.
Kom ons werk hierin eendragtig en met onverskrokke ywer saam - in elke groot stedelike gemeente, maar
ook in elke een van die kleinste plattelandse gemeentetjies. Kom ons maak sy liefde waar!
Mag ons Here ons seën en gebruik.
Hansie Schutte : VDM
CRADOCK
1 November 2003
122