Bibelen ein trygg vegvisar

Innleiing
Det siste året har eg lese Salme 119 fleire gonger. Kvar gong blir eg
fylt av takk og glede over å ha tilgang til Guds ord. Denne salmen
er den lengste i Bibelen og kanskje den mest forseggjorde når det gjeld
stil og struktur. Salmen er delt inn i 22 bolkar, ein bolk for kvar av dei
22 bokstavane i det hebraiske alfabetet i alfabetisk rekkjefølgje. Kvar bolk
er på 8 vers, og kvart av desse versa startar med same bokstav.
Salmisten, som sannsynlegvis er David, gleder seg over Guds Ord og
prisar Herren for alle velsigningane han finn i Ordet frå Gud. Han bruker
minst 10 ulike ord for Guds lov, men eitt av desse orda tek han som regel
med i kvart einaste vers. Salmisten er ivrig og uthaldande i å forstå og leva
etter Guds Ord. Han lærer Ordet utanåt. Han grundar på Ordet. Han
lengtar etter Ordet. Han ventar på Ordet. Han let Ordet styra livet og
oppførselen. Han finn håp og fred når han let seg leia av Ordet.
Eg trur at Salme 119 er svært viktig for alle kristne i denne tida. Difor
vil eg ta lesarane mine med meg gjennom denne salmen, vers for vers.
Dette er ein god måte å leva på: å ha fokus på Guds Ord slik salmisten
har! Guds Ord er vår rikaste skatt og vil gje oss eit rikt og spennande liv.
Salme 119 er alfabetet til den guddommelege kjærleiken, paradiset til
den kristne læra, skattkammeret til Den heilage ande, skulen til Sanninga,
og det djupe mysteriet i Skrifta der moralsk disiplin og alle kristelege
dydar skin gjennom alt. Denne salmen er som ein kristen ABC som lærer
oss å grunda på skattane i Guds Ord, skattar av lovprising, kjærleik og
kraft som viser oss korleis vi kan bruka Guds Ord i kvardagen.
Erling Thu,
Huset i skogen,
våren 2021
5