CADEMIA UDIOVISUAL - Academia Galega do Audiovisual

ANA KIRO, CANTANTE,
ACTRIZ E PRESENTADORA
1942 (ARZÚA)–2010 (OLEIROS)
QUERIDA ANA
Coñecina vai para 14 anos e tiven a sorte de traballar con ela e compartir moitas horas
do día ao longo das catro temporadas que durou “Tardes con Ana”, o magacine que
Gestmusic Endemol produciu para TVG .
Oprimeiro que me chamou a atención foi a súa gran vitalidade para afrontar tantas horas de
traballo. Gravabamos dous programas ao día, o primeiro deles en rigoroso directo. Resulta
complicado escribir sobre Ana sen emocionarse, a fin de contas era inevitable que a relación profesional
se convertira co tempo en personal, dando xeito a unha amizade que foi deixando pegada.
Porque era unha gran profesional, sen dúbida, pero por riba de calquera outra cousa era unha muller
intelixente, íntegra, boa e amiga dos seus amigos.
Ao longo de todo o tempo que traballamos xuntas, nunca deixou de sorprenderme a súa alegría de
vivir e a súa forza. Imaxino que, sen esa forza, nunca tería saído da súa Castañeda natal para emigrar
e converterse en artista, e de paso enfrontarse a todo o establecido.
Durante os anos que fixemos Tardes con Ana puiden ver como moitas persoas que acudían ao plató
a observaban con admiración. Puiden ser testemuña tamén de como Ana compartía sufrimento con
moitas das persoas que acudían a contar algunhas das súas duras historias, e como a esas persoas as
confortaba falar con ela. Ana enchía o plató, a xente percibíao, daba calor e recibíao. Defendía a
capa e espada as causas que lle tocaban na alma e iso a xente non o esquecía. Adorábana.
Recordo as súas ganas de aprender cousas novas nunha etapa da súa vida na que outros moitos só
terían tempo para pensar na xubilación. Recordo o seu sorriso, o seu riso, aqueles andares áxiles e
elegantes e mesmo aquel perfume que anunciaba a súa chegada, un perfume con carácter...coma ela.
Esa forza seguiu con ela incluso nos anos nos que se enfrontou á súa enfermidade. Recordo aquela
tarde de longa conversa, as súas ganas de loitar, de vivir, incluso de volver traballar.
Cando paso por Arzúa, de camiño a Lugo, irremediablemente me acordo de Ana, e do valor que
tivo toda a súa vida para facer o que ela realmente quería, fiel sempre aos seus principios e ás súas
crenzas.
Ana, traballadora incansable, muller inesquecible... dentro e fóra da pantalla.
Marga Palacios. Productora de Gestmusic Endemol en “Tardes con Ana” de TVG
Papeis da Academia Galega do Audiovisual 2010–2011 73
O B I T U A R I O