Edukata shoqërore - Erik Botime

Hyrje
Libri i mësuesit, i tekstit Edukata shoqërore 7, është ndërtuar
në përputhje me tekstin e edukatës sipas programit të
miratuar nga Ministria e Arsimit dhe e Shkencës.
Te ky libër u vihen në shërbim mësueseve të edukatës
modele orësh mësimore duke mos prekur hapësirat
që ka vetë mësuesi për të përcaktuar, ideuar e organizuar
orën e mësimit.
Në libër është paraqitur fillimisht plani mësimor i
ndarë në kapituj e orë mësimi me objektivat kryesore sipas
niveleve dhe mjetet e nevojshme që do të përdoren gjatë
orës së mësimit.
Zhvillimi i mësimit është modeluar sipas strukturës
PNP dhe ERR. 27 tema të reja të ndara në 6 kapituj, 3
orë përsëritje dhe 5 orë të lira plotësojnë programin vjetor
prej 25 orësh. Në këtë libër janë paraqitur 3 teste, të cilat
mësuesja mund t’ i zhvillojë me shkrim, pas dy kapitujve.
Çdo orë mësimore kalon në tre faza:
-Faza I- Parashikimi ose evokimi. Mësuesi shkruan
temën e re në dërrasë dhe i njeh nxënësit me objektivat që
do të arrihen, mjetet që do të përdoren, fjalët kyçe që do të
trajtohen. Përmes të pyeturit mësuesja nxit te nxënësit të
kujtojnë njohuritë e marra më parë, që do t’i shërbejnë në
fazën e dytë. Metodat që përdoren më tepër në këtë fazë
janë: bashkëbisedimi, debati, kllasteri, krahasimi, stuhi
mendimi etj.
-Faza II- Ndërtimi i njohurive ose realizimi i
kuptimit. Jepen njohuritë e reja duke nxitur te nxënësit
mendimin kritik për njohuri, të cilat i kanë mësuar në klasat
e mëparshme, në lëndë të tjera apo i kanë dëgjuar në mjetet
e informimit. Mësuesja përdor metoda të tilla, si: diagram
veni, punë në grupe, kllaster etj.
-Faza III- Përforcim ose reflektim. Kjo fazë përfshin
një përmbledhje të çështjeve kryesore të temës së re.
Mësuesja shfrytëzon punën me tekstin, tabelat, komenton
fotot, mund të zhvillojë një minitest duke përforcuar konceptet
kryesore.
Edukata Shoqërore 7 Libër Mësuesi
5