SJS BibleSudy - Zulu FINAL - Diakonia Council of Churches

ISINGENISO
Zine izinto ezincane emhlabeni,
kepha ezihlakaniphe kakhulu:
izintuthwane ziyisizwe esingenamandla,
kepha zikwazi ukuzibekela ukudla kwazo ehlobo;
izimbila ziyisizwe esibuthakathaka,
kepha zikwazi ukwakha izindlu zazo emadwaleni;
izinkumbi azinankosi,
kepha ziphuma zonke ngamaviyo;
isibankwa ungasibamba ngesandla,
kepha sitholakala ngisho ezindlini zamakhosi. – Izaga 30:24–28
Lezizifundo zebhayibheli kanye nezinkonzo zilungiselelwe ukusetshenziswa
emabandleni aseThekwini ngesikhathi somkhosi wobulungiswa
(Social Justice Season) ngenyanga ka Agasti ku 2003. Nokho
lezizifundo zikulungele ukusetshenziswa yinoma yiliphi iqembu
elifisa ukwenza okuthile ngezinkinga zemvelo. Lokhu lingakwenza
ligxile okholweni nokulalela ukuthi uNkulunkulu uliholela ukuba
lenzeni.
Isiqubulo salomkhosi sisikhumbuza ukuthi ngempela lomhlaba
esihleli kuwo asizakhelanga wona kepha uyisipho esivela kuMdali.
Leli yikhaya lethu, okungukuphela kwalo.
Esahlukweni sokuqala sizogxila siveze ubuhle, izinhlobonhlobo
zendalo kanye nezimangaliso zayo. Isisekelo salezizihloko kuzobe
kungukholo lwethu lobuKhristu.
Esahlukweni sesibili sizovumbulula ezinye zezinselelo umhlaba
obhekene nazo, ezingacekela phansi ubuhle bendalo kaNkulunkulu.
Sizohlola imikhakha ethile efana nokwenyuka kwezinga lokushisa
emhlabeni, ukungcoliseka kwamanzi nezinye izindlela abantu abacekela
ngazo phansi balimaze imvelo. Kuliqiniso ukuthi abanye
abantu abaqondi ngengozi abayenzayo endalweni. Nokho abaningi
bazi kahle kepha ngenxa yomona kwezomnotho, ukuphangelana
ngezikhundla noma uqondo wokuthi “anginandaba”, bayaqhubeka
nokucekela phansi imvelo.
Isahluko sesithathu sincike esiqubulweni esithi “lapho ucabanga,
bhekelela izwe lonke, kepha uma wenza okuthile, yenze izinhlelo
zendawo yangakini”. Sizobheka izihloko ezithile eziyinselelo ngokwezindawo
zethu bese sibheka ukuthi ngabe umuntu ngamunye
5