Märzheft 2013 Umschlag - Gemeinde Schwellbrunn

Standorörderungskommission
Portrait Susanne Alder – Schwellbrunner Facebookerin
Am 16. Februar
1965 hets mi als
siebete ond
jüngschte Goof
vo’s Alders im Setz
no iägschneit. Of
em Setzhèèmetli
bini denn au
gross worde
(also... föchelig
gross scho nüd, aber schlosch deför au
nüd allpot de Grend a). Mini Goofejohre
sönd prägt gse vo de Puurerei ond
em zueghörige Bergwertschäli, woni
halt au öppe ha möse hölfe. Da ischt
aber dozmol nünt Anders gse, es ischt
allne Goofe gliich gange ond gschadt
hets liberement nünt. I bi all gern im
Stall gsee ond ha au jedi Chue ond
jede Galtlig am Grend aa kennt. Drom
hani halt au jedes Mol blaaret, wenn
de Vater wider e Chälbli oder e Chue
verchau het. Doozmòòl hés för mi
nünt anders geh als z'buure. Ischt jetz
halt nüd ganz ase usecho wiäni mer da
vorgstellt ha.
Noch de Primarschuelzit im Risischuelhüsli
ond im Rank bini zwä Johr of
Herisau id Sek, denn ischt mer
d'Schuel förs erscht verläädet. Zom
lerne choche ond gärtnere hani z’Ebnat
Kappel e Hushaltlehrjohr gmacht. I
ha nüd alles Gmües kennt ond prompt
di lätze Chohlräbli zom Garte us grop.
Doo bini gär nüd grüemt worde vo de
Meischteri, aber seb het mi denn
glernt. Noch eme Johr Ushilf im Setz
obe bini z’Sanggalle osse ine Handelsschuel.
De Hoptlehrer het mi weg em
Dialekt förchelig aazöndt. Vo dem Tag
aa, woni min Vortrag öbers Thema
Musig gha ha ond no e Stöckli vorgspillt
ha vor de Klass, het er mi zmol i
all Böde iä grüemt. Endi 1986 bini dör
en Zuefall of Zöri abe cho. De Kulturschock
zwüschet em chline Appezellerdörfli
ond de gröschte Schwizerstadt
ischt gwalg gséé. Bis üseräm no s’Mul
uringt, hönd èmm d’Zörcher scho in
Bode iä gschnoret. Zmist ide Nacht
isch d’Inestadt no volle Lüt gséé, i ha
willsgò gmènt i gsèch nüd recht, woni
da s’érscht Mol erlèbt ha. Het mer e
Mol en Schwellbrönnler gsät, en Alder
vom Setz z’Zöri one sei wiä en
Schneemaa i de Sahara. Ganz oorecht
het er nüd gha.
Zerscht hani ime Ingenieurbüro z’Adliswil
Elektroscheme ond Schalge zeichnet
of eme Computer, wo dozmol no
wäss nüd wiä modern gséé isch. Wäret
däre Zit hani de KV‐Abschluss norgholt
ond bi spöter no mengmol froh gséé
om da Papierli. Noch em oogrechnete
Tod vom Vorgsetzte hani im Früelig
1996 zo de damolige Telecom PTT
z’Zöri gwechslet. Seb ischt e turbulen
Zit gséé, s’Telifon het tuschuur gschellet
ond wiäs halt eso ischt, hönd halt
amel au nüd alli Lüt de Guete gha wo
aaglüte hönd. Èmol hani de glich
Chond, woni noch eme zäche Telifon
endlech losworde bi, noch ere Stond
wider am Droht gha. I dere Zit ischt er
dör di halb Bude döre witerverbonde
worde. De sèb het efènge nüme ase
wohl gmènt.
Sit em 2006 schaffi bi de Stadtpolizei
Zöri im Beriich „automasche Verkehrskontrolle“,
tütsch gsäät
"Blitzchäschte". Nebscht Protokollfüerig
ond Projektärbet hani vill mit em
Bschtellwese ond de Finanze z,tue.
D‘Planig vo neue Radarstandört ond
d‘Beantworg vo Bürgeraafroge ghört
au zo mine Ufgobe.
E paar Us‐ ond Witerbildige hani au
gmacht i dene bald 50 Lebesjohr. Vo
2004 – 2006 hani di Schwizerisch Füerigsschuel
bsuecht ond mit eme eidgenössische
Diplom abgschlosse. Ide
Johre 2009 – 2010 hani os luter Gwonder
no d’Usbildig als Event ond Promo‐
onmanager in Agreff gno. För d’Abschlussärbet
he a de Zörcher Bahnhofstross
en Iiweihigsfescht för
Bild: Di Chlinscht vo Allne, stendligs (Berlin 2012)