Gemengeblat Biissen - Bissen

Klautjen 9| 2008 − 6
D’Biisser Porkierch
ass opgefrëscht
Am Laf vun deene leschte Méint gouf un
der Biisser Porkierch geschafft: Déi eelste
Fënstere goufe restauréiert, an d’Bänken
an der Mëtt gedeelt, sou datt elo nees e
Mëttelgank besteet.
Poléiert an ëmweltfrëndlech Fënsteren
Déi Biisser Porkierch huet dräi Zorte vu Fënsteren:
véier méi al, gemoolte Fënstere vir,
rechts a lénks vum Kiercheschëff; zwou kristalliséiert
Fënstere vun Uganks 20. Joerhonnert
am Chouer, an all déi aner Fënsteren am
Kiercheschëff, déi aus der Zäit nom Krich sinn.
Restauréiert goufen elo an enger éischter
Phas déi véier méi al, gemoolte Fënsteren,
déi aus dem Joer 1886 stamen, an och déi
wäertvollst sinn. Si stellen duer: d’Stengegung
vum Stephanus (dem 1. Kierchepatréiner),
d’Verbrenne vum Laurentius op engem Grill
(2. Kierchepatréiner), d’Visioun vun der
Schwëster Marie Marguerite Alacoque, déi
d’Häerz Jesu gesinn huet, an d’Iwwerreeche
vum Rousekranz vun der Muttergottes un den
hl. Dominikus.
Dës véier Fënstere sinn an all Bestanddeeler
zerluecht ginn: all Glasschierbel ass erëm
mat enger neier Verbläiung frësch zesummegesat
ginn, gerasse Stécker sinn duerch nei
Stécker ersat ginn. Selbstverständlech goufen
d’Glasstécker och gewäsch a gebotzt. Mer
hunn also quasi nei Fënstere mat ale Glasstécker.
Fir Energie ze spueren, ass baussen
eng extra Glasscheif agesat ginn, déi ofgedicht
gouf, an déi faarweg Fënstere sinn dräi
Zentimeter hannendrun (also no bannen) mat
enger Schrauwekonstruktioun festgemaach
ginn. Sou hu mer also ewell eng Duebelverglasung.
Et sinn zwou Fënsterëffnunge virgesinn (grad
esou wichteg wéi eng Heizung am Wanter ass
d’Lëfte vun der Kierch am Summer), an zwar
esou, dass d’Glas no baussen opgeet (si kippt
net méi), an et net era reene kann oder Vigel
erakomme kënnen.
D’Hasteng, déi ferm gelidden hunn ënnert der
Witterung an dem Dauwendréck, sinn ausgebessert
an ausgeschmiert ginn. Ee Koffer-
blech ass baussen ënnert d’Fënstere geluecht
ginn, fir dass d’Waasser no baussen ofleeft.
Fir d’Fënsteren an d’Hasteng virun den
Dauwen ze schützen, ginn nach dënn Dréit
gespaant, fir dass d’Dauwen sech do net méi
ophale kënnen.
D’Kierchefabrik seet der Gemeng villmools
Merci fir dës opwänneg Aarbechten, déi zum
Gudde fir d’Gebai sinn, an déi eis hëllefen,
vill Energie ze spueren. Déi véier wäertvollst
Fënstere si gemaach! Déi aner bleiwen nach ze
maachen. Et muss een ervirsträichen, dass eis
Kierch ee ganzen Ar Fënsterfläch huet.