Español

84
JONGUESUNE CONDASE’CHO
Tsampini jacan’cho: 24 de julio-16 de agosto, 2001
Mani Ta’tacho: Coanifoe ande, Andes ccottacco andepa’ttisuma, 450 metros asta 2.341 metros;
tsa coanifuoe andeta tsu; Bermejo tsutoni, toya’caen Chandia Nae tsutoni, asta
Ocomari Ccottaccopie; toya’caen Sieguyo estacion’tti asta Shishicho
Ccottaccopie; toya’caen Ccuccono’qqui’su sinju, toya’caen tsenisu ccottacco.
(Canja Figura 2, toya’caen y.)
Jongoesuma atesuye jacan’cho: Quinicco’su, toya’caen sapo, iyo, shishittoshe’su, toya’caen ca’tse’su, toya’caen
osha’cho aña’cho’su.
Jonguesuma gi attefa: Jacasundenccu tsu atte, ñoa’me tsu injenge pacco va andema coiraye.
Injantsse ccottacco’su tsampi tsu toya doengatsse jin’cho, sinjuccune asta se’fatsia
ccottacconga. Oshacho echoccopa tsu tseni jin’cho, sinju’su cansia, toyacaen
ccottacco’su cansia, pa’cco fue’ttini. Tsaimbittse tsenisu cansia tsu ccani
cansefambi, tsambita tsu tayo sefaji. Vani tsu doengattse sheque. Toya’caen
injanttse vanisu añacho, toyacaen quini’si, tsu tansi tse’tti jincho. Va tsampi tsu
tayopi Cofandeccumbe andesi tsu tseni a’ija tsave canse. Tsa’ma ja’ño cocama
bo’asi tsu pa’cco tsampija sefaye ashen.
Coanifue avuja’qquinga gi injan’ttse cuna o zie atesuyembichoa quini’si,
toya’caen añachoma atte’fa. Enttinge ta tsu cuna Ecuadorne, enttingeta tsu cientificondeccu
toya atesumbichoa. Enttingeta tsu fuesu andeni me’io. Va’ttinga gi
aqque re’ricco ingi attechone condase’faye.
Tsampine condasecho: Tsampi tsu oshacho ccaninga’pa, 400 metros asta
2.000 m. Andeta tsu bove ñottsimbi, jombachone. Bermejoni tsu pasha injantsse
tsaccupa. Sinangoeni tsu tittse santsi. Vanisu tsampi tsu cambian’jecho tsampi, tsa
sinjuccu’su tsampi tsu vani tsangaeyi tsutonga, toyacaen tsa ccottaccosu tsampi tsu
vani tsangaeyi sefangi. Tsacamba tsu echoccopa jincho. 1.500 metronga tsu ñoa’me
ccottaccosu tsampija ashaen. Tansicho’fanga tsu fuesu tsampija jincho, tse’ttisu
patu sombocho pasha quini’sine inzatssia andesi. Pa’cco a’ta tsa ccottacconi tsu
in’jattse ccappoppoenje, tsacansi tsu injanttse coentti tsampive me’io.
Quinisine condasecho: Atefa gi 800 quini’si. 1.000 caccyema gi samboemba
anga’fa, toya’caen 600 caccyejema gi isian’fa. Toya’caen 1.000 quini’jima gi
agatto’fa, tsaiquiquiamba. Asittaenfa gi, osha’ta tsu 2.000, tsambita 3.000ma
pan’shaen tsu quini’sija jincho. Tayo tsu cientificondeccuja tansian’fa, diez quinisisi
tise attembichoama atte’fa. Osha’ta tsu fuesu diez tsu toya cca’i attembichoa.
Foe shincapa ocomari an’jencho tsu injanttse sheque Occomari Ccottaconi, tsa tsu
cientifico toya attembichoa. Rubiaceae qquen su’cho tsu vani ñoa’me injan’ttse
sheque. 35 genero, toya’caen 100 especie tsu va’su’suja jin. Orchidaceae,
Gesneriaceae, Sapotaceae, Bromeliaceae, y Pteridofitas qque tsu sheqque. Osha’cho
palma’suqque tsu sheque. Enttinge va oriente’su palmama tsu vani attefa.
RAPID BIOLOGICAL INVENTORIES INFORME / REPORT NO.3
JONGUESUNE CONDASE’CHO
Jongoesu tsu va ñottsia
tsampima in’jambiye dañoye:
Rande Añachone condasecho: Ingija attefa 42 rande añacho’su especie. Ocho
tsu pa’cco ande’su listanga tevoen’cho ñoa’me catsa sefajichove, toya’caen 17 tsu
tsa listanga tevoen’cho, junde coirambini nepiye tson’jechove. 12 tive’pasu
especiema cachi’fa, toyacaen inja’ttse ocomari, toya’caen ccovi cansechoma gi
attefa. Cientificondeccu toya atesumbichoa tutuyema gi atte’fa, toya’caen gi
asittaen’fa, osha’ta tsu tsenisu coshombi, toya’caen cca’i su’cho chipiri con’siqque
tsu cientifico toya attembichoa.
Ca’tsene (sanccopapa) condase’cho: Tsaimbitssia chhiririama gi cachipa
asittaen’fa. 399 especiema gi agatto’fa, tsa’ma osha’ta tsu 700ma panshaeña,
vasi’ttse can’jemba tta’ttani. Fue’cco tsu Ecuadorni toya cientifico attembichoa,
tsa si’an fongo.
Sapo’sune condase’cho: Tansi Sinangoefama gi can’fa, oshacho sapo, toyacaen
iyove. Tseni gi atte’fa 31 especie, tsa tsu 17 sapo, 6 iyo, 5 saramaquesa’can,
toya’caen 1 salamandre, 1 ttanjesi. Fuesuma ja’i ja’canda gi attefaye.
Va tsampita tsu vana’jen ccoangi naccuve attufapa. Lago Agrione caretera ji’cho
interosianica tsu tsa tsampi enttingeye jacho Tulcani. Tsa tsampita tsu
daño’masia. Tsa’ma tsu jañojan tsangae caretera jinchosi cocamanjan tsangae
canimba tsa tsampisu quini’jima daño’jen’fa. Toya’caen tsu tsampisu aña’cho
na’eni canseqque’suma tsu cocamajan daño’jenfa’fa.
Jañojan minga’tsu: Tsa Bermejo ande’ttita tsu coira’je’cho ande tsa’ma tsu oshayembi’qquia’caon
ñame ñotsse ambiañe’da tse’tti tsu jin ppurotsse Shishicho Ccuccono jinchoma
tsu linderoiccu tsa Reserva Ecologica Cayambe Coca ma puiyi’cco pañaccopa
semajen’fa a’i Sinaguesu deccuiccu. Toya’caen tsu fae tevoen’jema conveniome
tson’fa Ministerio del Ambientesuiccu.
ecuador: serranías cofán ENERO/JANUARY 2002
85