algemeen aanvaarde rekeningkundige praktyk vir niewinsgewende

Waar niewinsgewende organisasies wel poog om Standaarde oor AARP toe te pas, ondervind
hulle sekere probleme daarmee. Sommige probleme spruit voort uit die teoretiese
ontoepaslikheid van Standaarde oor AARP, terwyl ander probleme meer prakties van aard is.
Die kernprobleem wat ondervind word, setel in die vraagstuk of die kontantbasis of die
toevallingsgrondslag die geskikste vir niewinsgewende organisasies is.
“Fondsrekeningkunde” is verder kenmerkend aan niewinsgewende organisasies, maar daar
bestaan geen rekeningkundige standaard vir die verantwoording van “fondse” nie. Verskeie
probleme word verder ook met die erkenning van bates, waardedaling en
waardevermindering op bates ondervind, as gevolg van die feit dat die definisie van “bates”
en die maatstawwe vir die erkenning van bogenoemde, nie die unieke aard van
niewinsgewende organisasies in ag neem nie.
Verskeie vraagstukke bestaan oor die erkenning van ontvangstes as inkomste. Die
kernvraag is veral of donasies wat vir ‘n spesifieke doel ontvang is, donasies wat eers in ‘n
volgende jaar aangewend mag word, asook kapitale skenkings, as inkomste, laste of direk in
fondse verantwoord moet word. Niewinsgewende organisasies ondervind ook probleme met
die erkenning van sogenaamde “in natura” ontvangste, asook probleme met die erkenning
en aanbieding van ander vorme van inkomstes. Gegewe die aard en kenmerke van
niewinsgewende organisasies is prestasieverslagdoening ook problematies, aangesien die
“winssyfer” en ander gerapporteerde finansiële inligting dikwels nie die werklike “prestasie”
(bereiking van doelwitte) van niewinsgewende organisasies weerspieël nie. Verder is sekere
terminologieë van AARP ook nie toepaslik vir niewinsgewende organisasies nie.
In sommige lande is daar reeds eiesoortige rekeningkundige standaarde spesifiek vir
niewinsgewende organisasies ontwikkel en uitgereik. Die standaarde van Amerika, die
Verenigde Koninkryk, Kanada en Australië is ontleed en vergelyk om toepaslike
rekeningkundige beginsels vir niewinsgewende organisasies te bepaal. Die rekeningkundige
praktyk wat in bogenoemde lande toegepas word, is deur middel van empiriese toetse onder
gemeentes en welsynsorganisasies van die NG Kerk in die Vrystaat nagevors.
ii