Kommuneplanen sin handlingsdel - Fjell kommune

Omfanget av dei evaluerings- og planleggings- og styringssystema som vert etablerte må stå i eit
rimeleg forhold til dei praktiske behova ut frå mellom anna storleiken på eigedomsmassen, slik at
også denne delen av eigedomsforvaltninga blir kostnadseffektiv.
Resultatkrav: Ytterlegare systematisering av tilstandskartlegging og vedlikehaldsplanlegging for dei
kommunale bygga ved implementering av aktuelle modular i FDV-systemet "Jonathan" først for
skulane i 2013 og deretter for dei øvrige byggkategoriane utover i planperioden.
Delmål for eigedomsforvaltninga
Tilfredsstilla prioriterte brukarbehov:
Tilfredsstilling av brukarbehova er den grunnleggjande føresetnaden for dei fleste kommunale
bygningar. Behovstilfredsstillinga kan likevel ikkje vera utan avgrensing og utan prioritering i høve til
andre behov. Avveging og prioritering av brukarkrava i høve til dei føremålsmessige grunngjevingane
og dei kostnadsmessige verknadene må skje på eit avgjerdsnivå som har ansvar for begge deler.
Innføring av kostnadsdekkande husleige er eit kjent middel som har til føremål å la brukarane bera
alle dei kostnadsmessige konsekvensane av krava sine. Måling av brukarane si oppfatning av
bygningen, om lokala er eigna, inneklima, vedlikehald og forvaltningstenester går ofte inn i
profesjonelle eigedomsforvaltarar si evaluering. Nøkkeltal og benchmarking er særleg brukt i
samband med å kunne vurdera arealøkonomi, vedlikehaldsinnsats og kostnadseffektivitet.
Effektiv arealutnytting:
Dette betyr at tal kvadratmeter som til ei kvar tid vert nytta til eit bestemt føremål, bør vera så lågt
som mogeleg, føresett at det ikkje går ut over effektiviteten i høve til å realisera bruksføremålet på
ein kostnadseffektiv måte. Lokale det ikkje lenger er behov for, bør disponerast om til anna bruk,
seljast eller rivast. Lite effektiv arealutnytting er et vesentleg problem ikkje berre for kommunale
bygningar som skular, helsebygningar og andre føremålsbygg der behova endrar seg som følgje av
endringar i befolkninga, befolkninga sine behov og endringar i dei faglege krava som bruksføremåla
stiller til lokala. God arealøkonomi krev eit godt og rasjonelt samarbeid mellom eigedomsforvaltninga
og brukarane. Det må i denne samanheng også takast omsyn til om bygningen er verd å ta vare på i
seg sjølv, eller om han vil utgjera ein strategisk viktig arealressurs i eit meir langsiktig perspektiv.
Resultatkrav: Kommunen skal gjennomføra eit optimalt sal av eigedomar i løpet av planperioden med
sikte på reduserte låneopptak. Måltal for 2013: 10-20 mill.
Godt, verdibevarande vedlikehald:
Dette er uttrykk for eit optimalt vedlikehald, der arten og omfanget av vedlikehaldet vert vurdert i eit
langsiktig økonomisk perspektiv og i høve til dei politiske måla for eigedomsforvaltninga. Godt,
verdibevarande vedlikehald har mange ulike faglege aspekt. Planlegging og gjennomføring av
vedlikehaldet må ha eit bygningsfagleg hovudfokus, slik at tiltak som medverkar til å redusera
risikoen for akutte skader og reparasjonsbehov, blir prioriterte på ein rett måte. Som eit minimum
må det kunne krevjast at vedlikehaldet ikkje underskrir eit kostnadsoptimalt nivå.
44