PATRIMONIO OCULTO

Situada ao oeste de Ourense, a un paso de Portugal e da comarca pontevedresa da Paradanta, O Ribeiro é terra de fértiles vales sucados polos ríos Miño, e Avia.
O Ribeiro é sinónimo de viño, e xa na Idade Media os monxes do mosteiro de San Clodio, en Leiro, o elaboraban para envialo ás mesas señoriais.
A Denominación de Orixe Protegida Ribeiro é hoxe, a máis antiga de Galicia e unha das primeiras recoñecidas en España, e este mes de maio, celebra a 50ª Edición
da súa Feira do Viño, sen dúbida, unha boa ocasión para visitar esta histórica comarca.
Resulta difícil encontrar alguén que non coñeza o topónimo que identifica esta comarca, repleta de contrastes naturais e vestixios arquitectónicos do pasado
máis significativo de Galicia.
Á hora de revisar as obras deixadas polos nosos antepasados, sen dúbida, a capital do Ribeiro, Ribadavia, é un dos referentes dentro de Galicia. É famosa pola
súa xudaría, unha das máis importantes de España, que conserva a súa esencia medieval. A rúa das adegas e a da Santa Cruz, a praza da Madalena e as canellas
que se estenden dende aquí ata a muralla trasladan o viaxeiro ao máis puro ámbito medieval.
Un pasado que renace todos os anos na Festa da Historia, na que veciños e visitantes recrean a vida medieval da vila, nunha celebración de interese turístico
nacional que, a finais de agosto, abarrota Ribadavia.
O Ribeiro é tamén natureza e ten no monumento natural de Pena Corneira o seu espazo máis emblemático. Melón e as súas pozas, e as paisaxes de suaves abas
no val, xunto coa montaña de Avión, conforman unha paisaxe que define claramente a esencia deste territorio.
A auga corre por todo O Ribeiro, que é terra de balnearios e augas termais. A Arnoia, Laias, Cortegada, Berán ou Prexigueiro son ámbitos perfectos para completar
a visita a unha das comarcas máis atractivas de Galicia.
Abril-Xullo
75