Gjuha shqipe 2 - Albas

Libër mësuesi për tekstin “Gjuha shqipe 2”
që aty kalohet në shkallët e tjera të njohjes së tekstit. Nëpërmjet pyetjeve, nxënësi
ushtrohet jo vetëm për të folurin, po edhe për lidhjen logjike të mendimeve të tij.
Rubrika e dytë: Gjetja e përgjigjeve të sakta, e bën nxënësin që t’i rikthehet
edhe një herë tekstit. Alternativat në këtë rubrikë jepen herë mirë dhe herë gabim.
Nëpërmjet kësaj rubrike synohet të ushtrohet vëmendja e nxënësit në drejtim të
detajeve, hollësive. Alternativa që i kërkohet e bën nxënësin të kërkojë në tekst atë
pjesë që i duhet atij. Pra, kemi të bëjmë jo më me një lexim tërësor, por me një lexim
me synim. Ky është një lexim me laps në dorë.
Përveç këtyre rubrikave, që janë më kryesoret, në rubrikat e leximit ka edhe
punë me kërkesa të ndryshme dhe specifike për secilin tekst të zgjedhur. Disa herë
nxënësit i kërkohet ndonjë detyrë e shkurtër me shkrim, e cila mund të punohet
ose drejtpërdrejt në libër me laps, ose mund të shkruhet në fletoren e detyrave të
shtëpisë apo të klasës, sipas rastit.
Në librin e mësuesit janë dhënë modele të ndryshme që e ndihmojnë nxënësin
të përvetësojë sa më mirë kuptimin e pjesës. Grafikët organizues, Dora e pyetjeve,
Harta e ngjarjes, Rrjedha e ngjarjes etj. e bëjnë nxënësin që të kuptojë pjesën në
mënyrë logjike e tërheqëse dhe ta ritregojë saktë e bukur përmbajtjen.
TË FOLURIT
2. Nëpërmjet rubrikës Bisedojmë së bashku, nxënësi duhet të arrijë:
- Të dëgjojë e të flasë rreth një teme të caktuar.
- Të shprehë lirisht mendimet e veta.
- Të fitojë shprehitë e bashkëbisedimit dhe të folurit në grup.
Secila temë e kësaj rubrike është parashikuar të zhvillohet në 1 orë. Këto tema
janë të integruara me temat e pjesëve të leximit. Pasi nxënësi lexon dhe kupton një
pjesë, në këto orë mësimore ai ka mundësi të reflektojë se si e përjeton atë ngjarje
në jetën e tij.
Qëllimi i këtyre temave nga ana e standardeve lëndore është që nxënësi:
• të ushtrojë të folurin duke bashkëbiseduar, diskutuar dhe shfaqur mendime për
tema nga më të ndryshmet,
• të pasurojë fjalorin në varësi të fushës tematike,
• të shprehë mendimet a të japë informacionin që i kërkohet, me fjali të ndërtuara
saktë dhe sa më shkurt,
• të flasë qartë e pa gabime,
• të shprehë gojarisht mendimin e tij për një personazh,
• të tregojë se si ka kaluar një shëtitje, si luan me shokët, si reflekton ndaj të
tjerëve, në shtëpi apo mjedisin e jashtëm, si i përjeton ngjarjet, përrallat, tregimet,
emocionet dhe mbresat.