Edukata - Erik Botime

Parathënie
Të dashur mësimdhënës!
Edukimi qytetar është një proces i gjatë, i cili fillon që në fëmijëri,
e zgjat gjithë jetën. Pajisja me njohuri në këtë lëndë është si rezultat
i punës interaktive mes nxënësve, mësuesve, prindërve, shokëve e
shoqeve. Më shumë se çdo lëndë tjetër në lëndën e Edukimit qytetar
nxënësit bëhen më të pavarur dhe më praktikë, duke e kthyer kështu
këtë lëndë jo vetëm në marrjen e njohurive në teori, por edhe në sjellje
konkrete e praktike. Prandaj, përvetësimi i njohurive mbi temat nuk
mund të bëhet pa zhvillimin e ushtrimeve, pa vrojtime të drejtpërdrejta
nga jeta në familje e komunitet. Temat mësimore të këtij libri janë të
karakterit universal dhe i përkasin secilit qytetar në veçanti, secilit
grup apo komunitet në përgjithësi. Temat mësimore ofrojnë jo vetëm
njohuri, por nëpërmjet ushtrimeve dhe ilustrimeve me fotografi ofrohet
gjithashtu zbatimi në praktikë i teorisë. Detyrat e shtëpisë apo punët e
pavarura, diskutimet janë tregues i arritjeve ndërlëndore. Një dedikim
të veçantë kërkon zbatimi i rubrikës së Aktiviteteve, ku nxënësit me
njohuritë që kanë marrë mbi temat mësimore arrijnë të shtrijnë më
tej këtë informacion, të krijojnë dhe të shprehen njëkohësisht, por
mbetet përgjegjësi e mësuesve se si do të organizojnë realizimin e
objektivave mësimore.
Çfarë është Edukimi Qytetar?
Edukimi Qytetar është përgatitja e individëve për të marrë pjesë
si qytetarë aktiv. Qytetaria nuk është diçka që ndodh vetë. Ajo mund
të zhvillohet vetëm kur një numër i konsiderueshëm njerëzish, kanë
dëshirën të shërbejnë si qytetarë për të qeverisur veten e tyre. Edukimi
Qytetar nuk është vetëm të mësojmë si të jemi qytetarë të mirë tani,
por edhe si të praktikojmë qytetarinë tonë, dhe të jemi qytetarë më të
mirë në të ardhmen. Qytetaria jonë pasqyron se kush jemi, si jetojmë
me njëri-tjetrin Qytetarët ndryshojnë nga njëri-tjetri sipas kulturës,
besimit, gjinisë, pjesëmarrjes qytetare, përkatësisë komunitare etj. Në
një shoqëri demokratike qytetarët kanë përgjegjësinë kryesore për t’u
angazhuar në jetën publike. Edukimi Qytetar është i rëndësishëm, pasi
çdo shoqëri ka nevojë që njerëzit të kontribuojnë në mënyrë sa më
efektive, në rrugë të ndryshme, për një komunitet më të shëndoshë,
për një mjedis më të mirë dhe një zhvillim sa më të qëndrueshëm.
5