HALTERN AM SEE - Rswmedia

24 Gesundheit
Dies und das auf Halterner Platt
De Ölleren unner us küent sick villicht nao drup besinnen,
dat dat Fasten fröher, in usse Blagentied, vull strenger
nuommen wuor äs vandage. Een Bispiell: Wi droff en äs
Blagen sess Wiäken lang, tüsken Askedagg un Paosken,
keen Krüemelken Söetes iäten. Keene Bömskes, keene
Lakritzen, all gar keene Schokolade. Nich dat wi sowat
Leckers fröher alle Dage krieggen härrn, aowwer sess lange
Wiäken ganz aohne, dat is us daomaols wisse nich licht
fallen.
Gued dat et dann kuort vör Paosken den Palmsunndagg
gaff . Ook in usse Blagentied wuorn de Palmstöcke, so äs
dat vandage no bi us in Haltern Usus is, met Bucksboom
un bunte Siedenpapeerbänder smückt, schöen un prächtig
antekieken.
Män dat hät us Kinner daomaols wenniger intresseert. Wi
häbbt mähr up den Hahn buoben drup kieken, lecker ut
söeten Deek backt, met Oogen ut Korinthen. De satt up
eenen Appel off up eene Appelsine. Aowwer no schöener
wassen all de bunten Bömskes un de Plätzkeskringel, we
an den Bucksboom hongen. Eent saog no verlockender ut
äs dat annere, besünners
no fi ef Wiäken
Aff stinenz.
Ook daomaols all wass de Geist willig, män dat Fleesk,
so beduerlick äs dat nu maol is, bi us Blagen swack. Bi de
Palmprossjone, we drei maol üm de Kirke gong, is no alls
gued gaohn. Ussen wunnerschöenen Palmstock, we Moder
saoterdaggs aobends met vull Leiwe un Küenen terechte
Maakt harr, bleef no heile. Aowwer dann kamm de Misse,
un de hätt duert un duert. För all de Blagen met äöhre
Palmstöcke wass düsse Prowe villicht een bietken te hatt.
So is dann näömlick passeert, wat nich passeern droff . All
gar nich up den hilligen Palmsunndagg midden inne Kirke.
De Bömskes un Plätzkes an ussen Palmstock, we bi de lange
Misse vör us in de Banke lagg, wo wi Schoolblagen met
ussen Magister riegasnao satten, dütt söete Gerai keek us
verlockend an. Et hätt daorüm nich lang duert, büs dat eene
van us stillkes un heimlick een Bömsken van sienen festlick
smückten Palmstock aff knibbelt un tüsken de Tände hätt
verswinnen laoten.
De annern häff t dat natürlick naomaakt, un et duern nich
lang, dao wäören alle Blagen met Bömskeslutsken off
Plätzesiäten tegänge. För de Palmsunndaggspriäge van usse
Härr Pastor hätt keeneene mähr een Aohr hatt. Jao ick
mott sogar ingestaohn, dat ennigen sick sogar an de
Hähne buoben up äöhre Palmstöcke vergriäpen
häff t. Irst häff t se de Korinthenoogen ruutpuult
un dann, wann usse Magister jüst in sien
Biädebook keek un affl enkt wass, sogar den
Gockel den Kopp aff biäten.
Dat usse Palmstöcke manksen all wahne geruppt
utsaogen, wann wi nao de Misse daomet nao
Huus hen trocken, dat lött sick daorüm villicht
begriepen. Män Moder anthuus dai so, äs wann se
dat gar nich saog. Se hätt nicks säggt un ook nich
schimpt. Ähr gong dat wull mähr üm de wiehten
Bucksboomstrükskes, we se dann int Huus ächter
Hilligenbelder un Krüüße verdeelt hätt. Usse
lässlicke Sünne tiegen dat Fastengebott hätt dao wull
keene so groote Rulle spiellt.
Heinz Kallho�