Juli 2021 Borkum-Aktuell - Das Inselmagazin

Borkum - Aktuell Das Inselmagazin
Ein Woord up platt
In Oostfreisland is‘t am besten...
An de 21. November 1820 is in Dornum in Oostfreisland Enno Wilhelm Hektor up de
Wereld komen. All fraug begünnde heej Märchen un Gedichten tau skrieven. In dat
Jahr van de börgerlike Revolution 1848 gaff heej de politisch-satirische Zeitung „Der
Vagabund“ drut un ein Jahr later hett heej Dornum verlaten un leevde tweej Jahr in
Nürnberg, waar heej sien Abitur nahaalt hett. Heej begünnde tau krükeln un hett versöcht
sück dat Leven tau nehmen. Dör gaude Fründen is heej na München komen un hett
olddütse un oldnoordske Spraken studeiert un hett uk sien Doktor in dat Fack Germanistik
makt.
1857 was Hektor Bibliothekssekretär bi dat Germanische Musum in Nürnberg. Heej hett
uk mithulpen bi de Monatszeitschrift „Die deutschen Mundarten“. An de 31. Januar 1874
is heej inslapen un funn sien letzde Rüst up de Rochus-Karkhoff in Nürnberg.
1850 satt Hektor in de Kraug Knieps in Dernau (dat liggt in‘t Süden van Bonn an de
Ahr) un hett dat Leid skreven „In Oostfreisland is‘t am besten“, dat heej erst neumt hett
„Sehnsucht na de Heimat“.
In Oostfreisland is‘t am besten,
over Freisland geiht d‘t nix!
Waar bin wall de Wichter moijer,
waar de Junges wall so fix?
In Oostfreisland mag ik wesen,
anders nargends leiver wesen,
over Freisland geiht d‘r nix.
Waar in‘d Wagen Törf un Kienhollt
warden haalt van‘t Hoogmoor her;
waar de heile Welt sück lüsteg
makt up‘t Iis bi‘t Eierbeer;
waar s‘ int Feld mit Kloten skeiten,
waar seej Baukweit-Schubbers eten,
Harm up Freiersfauten geiht.
Nargends blöiht de Saat so moije,
nargends is de Buur so riek,
nargends bin de Kaujen fetter,
nargends geiht de Plaug so liek,
nargends gifft so faste Knaken,
weit man leckerder tau maken
Botter, Keis un Karmelkbree.
Nee, t‘iss nargends, nargends beter
as waar hoog de Dieken stahn,
waar up‘t Eiland an de Dünen
hoog herup de Bulgen slaan;
waar so luut de Noordseej bullert,
waar ji könen an de Dollart
Dreejmast-Schkepen fahren seihn.
För Oostfreisland, för Oostfreisland
laat ik Blaut un Leven geern,
was‘k doch man weer in Oostfreisland,
waar so meneg seute Deern!
In de Frömde wünsch ik faken:
Kunn‘k doch Mauders Breejpott smaken;
satt‘k doch weer in‘d Hörn bi‘t Für!
Allerbest Jan
Un hier könen ji dat uk hören: (Youtube)
108