KölnerLeben August/September 2023

26
Vergnügliches
Nä, wat e Panorama!
Sage mer ens esu: Wann do he op der linken Sick der
Rhing langs jeis, sage mer vum Schukeladmuseum noh
der Bastei, sühs vun däm Panorama nix un nühs. Jot,
jäjenüvver hinger Vringsbröck un der Düxer Bröck, tja,
do sühste de Mess un der RTL, un dovör die jroße Freitrapp;
nu jo. Ävver öm dat Kölner Panorama, also quasi
dat Panorama, ze sinn, musste op die Schäl Sick. Jo, dann
loorste, wie unse Ludwig Sebus singk, „vun Düx noh
Kölle, vum Zauber bes do platt“. – Jojo, dat es ald e
herrlich Bild! Un jevv dingem Bleck de Koss: Mer sin en
Düx op der jroßen Trapp, ner Terrass voll Hemmel un
Minsche, mer han herrlich Wedder, Jung un Ald hocke,
setze, lijje, jogge, jon spazeere, met un ohne Rollatore,
schwaade, laache un han ehr Freud an sich un an Kölle.
He es der Minsch bei sich doheim.
Un vör dir fleeß dä staatse Rhing, wann hä dann öntlich
Wasser hät. Un Scheffjer schwemme rop un erav, se
tuute un mer wink sich jäjensiggich zo. Dä Strom, he es
ald nen Kaventsmann!
Un hinge links sühste dä Bayentoon, dann die Vringsbröck,
die ussüht wie nen Botzedräjer, dann die klein,
ävver fing Kirch Maria Lyskirche, wo drusse de Scheffermadonna
winke deit. Un dann ston do piel die drei Kranhüser,
die se vör Johr un Dach nevve die ahl Lagerhüser
Von Armin Foxius
vum „Sibbejebirch“ gesatz han. Jetz die Düxer Bröck,
üvver die mer jekumme sin, öm uns he dat Spektakel
vun Panorama anzosinn. Un do, dä kleine wieße Knubbel:
Dat es der Pejel, wo mer avlese kann, wie huh der
Rhing steit. Die Partie, die jetz kütt, soll ens der Rhingjade
weede, wo mer schön flaneere kann un Foßjänger
un Radfahrer sich arrangjeere müsse. Ens loore, wie dat
jeit, wann dat fädich weed!
Dä schwere un staatse Toon von Jroß Sankt Martin wor
ens för lange Zick et Hühkste he am Ufer, bes der Dom
fädich wor. Tja, un dann kütt dä och ald. Wie dä do op
dem Hüjel steit! Dat es die Krun vun dem janze Panorama,
su kenne se dat en der janzen Welt: Rhing, bungke
Hüsjer, Bröcke, Kirche un dä Dom met singe spetze
Öhrcher; do weißte immer, wo mer dran es. Un es et
üvverdrivve, wann mer fröch: Wo jitt et dat noch ens?
Un wie jesaat, su richtich jeneeße kannste dat, wann de
üvver die Düxer Bröck rüvver jejange bes, an der lang
Trapp lang, bes zum Hyatt-Hotel, wo se för jod Jeld Dach
un Naach nit jenoch vun däm Aanbleck krijje künne.
Un dann retour üvver die Hohenzollernbröck an dä dausende
Liebesschlösser vorbei, erin en die Altstadt, öm do
met Kölsche, Buure usem Ömland, Touriste un Frembcher
zo süffele, zo müffele, zo schwaade, zo laache.
Anzeige
KölnerLeben Heft 4 | 23