Rapport da gestiun 2008 Banca Raiffeisen Disentis/Cadi

Stimadas commembras, stimai commembers
Ei legra nus d’astgar presentar a Vus entras quei rapport da
gestiun il resultat digl onn 2008. Malgrad las difficultads e las
turbulenzas entuorn las fieras da finanzas sco era la gronda
concurrenza sin la fiera da bancas svizra, sa nossa banca Raiffeisen
mirar anavos sin in bien e fritgeivel onn da fatschenta.
Quei secapescha buca da sesez, legra denton nus ed attesta che
la filosofia da Raiffeisen constat pli che mai.
Dapli ch’in agir orientaus mo sin gudogn
Il success dils davos onns havein nus d’engraziar a Vus. Vus
schenghegeis a nus di per di Vossa confidonza. Nus essan pertscharts
che Vus spitgeis bia da nus. Confidonza sto vegnir
acquistada entras lavur endinada. Il continuau carschament da
nossa famiglia Raiffeisen muossa che nus essan sin la dretga via.
Aschia essan nus perschuadi da nossa finamira da combinar
ella fatschenta bancara las valurs humanas cun l’economia da
menaschi. Quella finamira accumpogna nus sin la via communabla
cun Vus.
Obligaziun pigl avegnir
Vossa confidonza oblighescha nus – oz ed era egl avegnir.
Nus tgirein sapientivamein nos segns caracteristics che meinan
al success dalla marca Raiffeisen: la vischinonza tier nos commembers
e clients, la quala possibilitescha ina cussegliaziun individuala
tenor ils basegns dil client – perquei che nus enconuschin
Vus e la situaziun locala. La segirtad tier Raiffeisen che
sebasa sin in sistem da segirtad cumplex e solidaric. Tut quei
ensemen garantescha a Vus in’aulta segirtad. E la singularitad
dalla commembranza da Raiffeisen. Singular perquei che Vus
sco commember e cheutras sco cunproprietari e cuninterprendider
da nossa banca Raiffeisen surprendeis responsabladad e
saveis era influenzar. Alla radunonza generala dirigis Vus la sort
da nossa banca, separticipeis Vus vid decisiuns strategicas ed
elegis persunas da confidonza el cussegl d’administraziun. Quei
avantatg immaterial dat ei mo tier Raiffeisen.
Partenadi fair ed a liunga vesta
Sper ils avantatgs immaterials aulzan las purschidas materialas
l’attractivitad dalla commembranza da Raiffeisen. Quei cumpeglia
per exempel ils tscheins attractivs, spesas reducidas, il
pass per museums, ni la purschida «Eveniment Svizra» per commembers
per miez prezi – igl onn vargau cun l’arrivada el
Grischun.
Quei tut meina tier in partenadi fair ed a liunga vesta, sil qual
nossa banca dat gronda peisa.
Nus engraziein a Vus per la confidonza demussada e selegrein
d’astgar accumpignar Vus era egl avegnir sco ideal partenari da
finanzas e d’astgar rasar ora il teppi tgietschen per Vus.
il president dil cussegl d’administraziun: il directur:
Gion Battesta Manetsch Alfons Quinter