Rodez - 1979 - Université de Provence

Lübekc, 1-11-1940.
TOTSANTS DE BATALHA
Totsants dins lo cel gris e fresc, las nivols lizon.
Los graulas en amont luchon contra lo vent,
E los aglands, pel sol, sus la mossa granizon,
Del temps que lo braucun mormola un planh dolent.
Las femnas, en plorant, porton de flors que rizon
Coma un darnier rebat d'amor e de printemps.
E las donas en dol, de ginolhon, florisson
La peira del tombel, de lor brassat nolent.
Sabi de tombas, io, que serán pas floridas,
En aval son, pels boscs, solas, adolentidas,
Qu'esperarán jamay un ginolh dolveros.
Solet lo vent del Nort, butint las felhas mortas,
Ondrará l'ataüc benezit d'una croz,
Paura croz de falhard facha de brancas tortas.
Lübeck, 4-11-1940.
BATALHA
L'aire sembla de fioc, jol solelh que flambeja.
Balas, tanks e canons, fan un orre sagan.
Un ponhat de valents arnescats de correjas
Vas l'enemic, ferons, sempre van en davans.
Subran una estafeta aqui se planta drecha,
Tou negra de podra e rajanta de sang,
Senhala l'enemis a pena a lega mieja
Qu'emb sos carris d’acier arriba coma un lamp.
L'ouficier s'es virat vas sos omes en plassa:
“ Plantatz aqui, so dis: vau veire que se passa;
Se per cas, pres, veniay a geinar vostre tir,
Vos comandi, soldats, de me traucar de balas.
Los cassaires an vist s'en anar lo martir
E l'afan de la mort maca lor cara pala.
Hambour-Fischbeck,
22-6-1941.