Rodez - 1979 - Université de Provence

Mon Dieu! que n'aviam fach de legas
Los rencs pautats e torsuts
Jos l'arnes que, tal un corset
Nos cajant, nos dezalenava,
E la som nos curant los elhs!
Aviam fach el revers lo camin d'un cop era:
Lo camin segut n'a gaire un matin
Montant en cantant al front de bandiera,
Aviam tornat far lo meteis camin.
Pertant, fugissiam pas! dins la bela desbranda
Ciuclats de tus pans, veniam tener cop
Pecaire, assajant d'arrestar la granda
Mar d'omes, de dol, de mort e de fioc.
E del temps qu'arreduts, morts de fam, de flaquiera
A l'aflet del peg montaviam pautats;
L'armada del Rin, oc, l'armada entiera
Ay! fazia fugir conons e soldats.
Dins l'orre mescladis de tropas delargadas
Jitant sacs, fuzilhs, vieure, arnescament
Per corre may viste a belas cambadas,
Sola, nostra tropa avansa de reng!
Ah! s'avansa de reng parier qu'a la parada;
Dins lo groün s'engulha coma un cunh;
I an donat mission de parar l'armada,
Al poste d'onor marcha de contunh.
E pamens, dins lo ser, una voz dolentoza,
Un voz de femna ay! nos a cridat,
Una voz crudela, ispra e verinoza,
Als soldats rengats, l'escorna a jitat.
- May vosautres tant ben! vosautres los cassaires!
Vos autres tant ben, ô flacs, fugissetz! ”
Me vireri io, purava pecaire!
Son viston negat sul pic m'amaisset.
Femna, te pures pas. De l’armada enciuclada,
Nos autres monten per salvar l'onor;
E deman, veirás dins la malparada
Flambejar dil cel lo nostre auriflor.
A cent cambats d'aici, al cimel de l'autura
Nos veirás, ferons, luchar e morir;
E veirás levar la meisson madura
De las pauras croz que vendrás florir. ”