Rodez - 1979 - Université de Provence

Vostra gesta esplandorenca
Es un senhal de lumiera
Pels mascles del terrador,
Vos, qu'avets tirat blandanta,
Per la lucha tresperduda,
Dels Allobroges testuts,
La vielha espaza bercada.
O ma terra nadalenca,
Tu tant ben, ma vielha terra
Quilha, quilha l'auriflor,
E contra la bestia orlanta,
Contra la bestia pautuda,
Sona, sona a cors perdut
E rampela ton armada.
Que ta crida, en la marsenca,
Creisse e monte clara e fiera
Dels cloquiers e de las tors.
Galh assucat, canta, canta;
Que ta voz ardida e ruda,
De cada cloquier ponchut,
Rolle d'aussada en aussada.
A la voz terradorenca,
Per la batesta auturiera,
Rampelatz vos per l'estorn;
Que l'espaza blandejanta
Tuste ferme, tuste druda;
Que la bestia als dets crocuts
Fasque l'ultima racada.
Leu dins l'esplendor albenca,
Tornamay gaujoza e fiera,
Nostra patria a l'onor,
Arcarà, may frezinanta,
Per l'arderoza beguda,
Lo grezal, dins l'albaluz
De la libertat tornada.
Terra, al cimel, vuey crescuda,
Terra d'autura, salut,
Qu'as sonat la rampelada!
18-3-1943
ZO!
Mentirétz pas a vostre sang,