Rodez - 1979 - Université de Provence

Meisson d'estorn que la terra trepada
A vist grelhar dins un gigant esfors.
De say, se lay, pertot, tral randalha, dins la prada,
Pel la plana, pels boscs, a l'orle dels camins,
Sus la cresta dels pegs, al cimel de l'aussada,
Suls travers tot rimats coma vielhs parguemins
De tots pans, d'en pertot, leva la meisson fera
Remenbre d'espavent de l'ultime combat,
Qu'en son orre prefach, a samenat la guerra,
Seme de fioc, de fer, dins un sol afrabat.
Sacs e fuzilhs, mitrallhairas torsadas
E qu'an beleu quitament pas tirat
D'aquel rastolh, la plana n'es teissuda:
Triste rastolh, brezat, cambavirat.
Els que, n'a pauc, fazian tant tronadissa,
Los tanks vergonhos, muts, brezats, traucats,
Al raz d'un talus, d'arrer'na ramdissa,
Acaton lo dol de lors cors macats.
Un pauc de pertot, ennaussant sa gula,
Un canon sautat nazarda lo cel;
Sa gesta vana e leda e ridicula
Bota frech a l'ama e grumilh a l'elh.
Mas plus dolveroza es la vista fera
Dels blokaus brezats, que de lon en lon,
Son agromelats coma talpanhera
Amagant lor mort dins lo froment blond.
E coma gavels, la plana rossela
Leva la meisson de milantas cros
Que lo ventolet mormolant capela
Jos las ersas d'or, dins lo ser negros.
L'IVERN MALDICH VOL PAS MORIR
La neu, sempre la neu, lo glas e la frescura;
L'ivern maldich jos sa manta de blanca bura
L'ivern maldich vol pas morir!
Ai! dumpei trop de temps, la terra es acatada
Del saile blanc que la ten sempre enmantelada;
L'ivern maldich vol pas morir!
Tot, tot es de nivel, jos la blanca ondradura: