Rodez - 1979 - Université de Provence

L'aire es tot secat e la terra flamba.
Los ostals cramats tombon un per un,
Los boscs abracats n'an plus que de camba:
Tot es podra e bruch, tot es fioc e fum.
La batesta es greva e la mort engola
En ricanejant lo sang que regola
Dins la polvera en revolum.
Un ponhat aqui de valents cassaires
Enfants del Mejorn; Gavachs, Pirenencs
Arreduts, suzos, avanson, pecaire,
Lo fuzilh al punh, avanson de reng,
Tornon de mission, qu'an luchat ferojes;
Dintron aflaquits e de vieu sang roje.
Ay lor front s'empega e se tenj.
Ay! semblon bandats tant qu'an de flaquiera,
Pecaire fa'n briu que n'an pas durmit,
E n'an pas minjat de cap de manhera
Dempeis l'albaluz: e tot encrumits
Jos’l solelh rajant los elhs lor parpalhon!
Negres e sannos als rocs se raspalhon.
En bruncant marchon atupits.
Mes vequi subran que lo tron bronzina:
Vas amont sus'l pech ont son los companhs
Bombas e bolets tombom a plovina
Los bels rocs clapats verson en bramant:
“ La lucha amont naut es ferona e ruda
E los assautats en bezonh d'ajuda
Ardit cassaires en davans! ”
Los omes cansats, las e trantolaires
An tot oublidat: som, flaquiera e fam.
Dercon al canon los braves cassaires,
Al cap del rispet monton de bel van.
Nargaires ferons de la mort que passa.
Demes lors amics venon prene plassa
Per far la mescla de lor sang.
Ah tiratz lo capel e clinatz vos plan bas
Davans aquels druds e fiers guerrejaires!
Pel nombre brutal son estats vencits
Los nevels faidits
Mas an drech al respect devot d'un pople amaire
Que lucheron africs en d'esglazios combats,
Nomas per l'onor del terraire.
Hambourg-Fischbeck,
2-7-1941