Rodez - 1979 - Université de Provence

MARTROS
Un mes, un mes feron de batesta e de brut,
Un mes, un contra dech, sens esper an tengut,
En luchant per salvar l'onor de la Patria.
Lucheron pe per pe, raguent barri de carn
Als tanks, per arestar l'assautaire bragard;
E lor sang azaguet lo sol de la Patria.
Lucheron sans relay jos la raissa de fer,
De bombas, de bolets, dins lo fum, sens esper:
Testards, mas dezarmats, paravon la Patria.
Pecaire! es estat van lor sacrifici ay las!
De vana son las croz qu'espadisson los bras:
L'arpia de l'enemic corcaja la Patria.
Tot es perdut, diziatz? Non, tot es pas perdut,
Que tot parier quicom demora clar e drut
Dins sa flambor, e quo's l'onor de la Patria.
Mas ailas! es pagat de mizera e de dol,
Lo sang roge e valent a sannat a rajol:
Pecaire! trop d'enfants son morts per la Patria!
E lo blassat dolent, e lo press fangalit
Patisson dins lor cors pel terraire falit
Portant la ruda croz qu'assuca la Patria.
Diu, vos preguem solas per tuts nostres soldats:
Pels morts consents, pels preijoniers e pels blassats
Que son la retraisson pura de la Patria.
Per tot so qu'an patit de fam, de set, de som,
Mon Diu, assostatz-los, vos remembrant que son
Los martros inocents d'una santa Patria.
Münster, 22-10-1942.
LORS ELHS
Ay vist lors elhs, e n'ay gardat
Coma una angoni dins l'ama.
Coma parlon! e qu'una flama
Dins aquels elhs de soldats!