Rodez - 1979 - Université de Provence

Aussor! aussor! per la Patria!
Aussor! los druts e los valents!
Aussor dins l'ardenta allegria!
Aussor! pels clars matins jauvents!
Aussor! consents
Per la Patria,
Mascles jovents!
Rampel als filhs de nostra rassa!
De nostra rassa en mal te mort.
Rampel! per li tornar sa plassa
Demes los poples bels e forts.
Dins lo malsort,
Filhs de la rassa,
Rampel als forts!
Per far tindar, campanejantas,
Las drudas vertuts de son sang,
Sonem las campanas tindantas,
Sonem las campanas a brand.
Qu'al rampel sant,
Campanejantas,
Trinon a brand,
De delay lor lauza frejala,
Los aujols, al fer campanal
De la retraizon patriala,
Se levaràn del sol mairal,
Portant acial,
De mans frejalas,
Al sol reiral.
Los d'antan, d'ongan, de deman,
O morts de l'autura e del camp!
Avis, lo païs vos rampela,
Dins l'ardidessa subrebela,
Parém nos man:
Que nos rampela
Un clar deman!
T'apararèm, Fransa esplendenta,
E los reires tos aimadors,
Nos mantendràn dins lor empenta,
Per fargar ton avenidor
Dins la baudor,
Fransa esplendenta
D'avenidor!