Rodez - 1979 - Université de Provence

Uros los que son morts jos la prima rafala,
Sens aver devinat la retreta mortala
May vist la Fransa de jinolh.
Uros los que son morts à la prima butida
E que n'an pas saugut nostra Fransa vencida
Sansolhada pel l'enemic.
Els n'an pas conegut l'emmescladis feroge
De civils, de soldats, jos un cel dur e roge
Dins un groün descabestrat:
Carretas demes tancs, canons e lémozinas,
Bestias, femnas, enfants, los vielhs e las meninas
Mesclats, pels camins trop estrechs.
E quand los regiments arcavon dins l'aurige,
Un pople espaventat, dessenat, en folige
Ailas! lor barrava camin!
Uros los que son morts a mas un contra quatre.
Quora sem estats pres sans poire bri nos batre
E nimay tirar lo canon!
Companhs morts, estatz siauds: a pas falit l'armada,
A tengut pe per pe, pecaire! sabrondada
Dins un flot d'omes e de fioc.
Bombas, bolets e tancs, tot aquo trancanava;
Quand tot aquo e tot al cop nos assautava
Pecaire! aviam que nostra carn!
Aviam que nostra carn et de fuzilhs sens balas.
Ah! quant ne son tombats ailas! jos las rafalas
Fraires, de verturos companhs!
Uros los qu'an pas vist la Fransa abocinada
E d'omes a milhons en cola dezarmada
Lizar dins la cattivitat!
Uros los que son morts a l'alba de la guerra,
Sens veire lo dezanh, lo dol e la mizera
D'un pople abandonat de Dieu!
Uros los que son morts dins la prima batalha,
Quora la mort rizenta, a plen de gloria, dalha
La segazon dels Aliscamps.
Uros los que son morts dins la prima batesta;
Uros car son tombats dins l'orgulh de l'assaut,
Drudessa al cor, esbrand en testa.