Rodez - 1979 - Université de Provence

Aurà pod ben s'avansar
Que i a pas may de granadas!
Sonca doas que, dins la man
L'aparaire garda enquera;
De tras bel roc los espera,
E dins un darrier afan
Al ras jita sa brassada.
Redolant l'autre rambers,
S'engulha en la neit escura
L'ama plena de rancura,
Lo cor amar, los elhs fers,
Jols bosc negre que fay clastre.
S'en vay sannos, trantolant,
Fier de la toca complida;
Vay dins la neit atupida
Vas d'autres combats gigants
Vas la gloria e lo malastre.
Hambourg-Fischbeck,
20-7-1941.
BELHOMME
Quo's lo darrier ressaut de l'ultima batesta;
Aqui son un ponhat que luchon a bel talh
Dins lo fum, dins lo fioc, al clam de la tempesta,
Al miej dels rangoluns e dels orres cridals.
Sempre faciant la mort, sempre quilhant la testa,
El, qu'a fach un blocaus d'aquel pichot ostal,
Lo lottenent vay, ven, vay, jamay no n'arresta.
Pel la paret, la mort bassaca a bels tustals;
Quo’s la fin, l'enemic, parier qu'un fioc de branda,
Avansa sens que ren non lo posque arrestar.
Per subrevieure pas a la negra desbranda,
L'ouficier rezolgut cerca a se far matar
E sortint de l'ostal, dressant tota sa talha,
Es tombat d'un sol cop, medut per la mitralha.
Belhomme lo cassaire es mort per son Païs!