copione - Silveria Gonzato

Iole, la morbinosa - .0
IOLE
‘Na pòra dòna che patìsse le to violènse. Te m’è inganà. Te dovéi dìrmelo, prima de scominçiàssino a discórar,
che te saréssi deventà ‘n mostro. La me l’à sempre dito me mama, poaréta, che no métarme con ti. La gavéa
resón éla e mi no l’ò gnanca scoltà.
GIGI
L’è mèio che no te diga sa la diséa de ti la me póra mama.
IOLE
Sa podéela dir de mi? Parla ciàro! Da ti e da la to pòra mama me spèto de tuto…e anca da to sorèla.
GIGI
E alóra pensa a tuto, che te ghe intìvi sens’àltro.
IOLE
A la to pòra mama, pace a l’ànema sua, no posso più dirghe gnénte, ma spèta che veda to sorèla, te vedarè sa
sucéde.
GIGI
Crédito che me sorèla la g’àbia paura de ti?
IOLE
Vedarémo.
GIGI
No ò mai capìo parché, de me pòro papà, no te disi mai gnénte.
IOLE
Se te lési i santi del calendario, nel mese de agosto, te cati un san Nane. Con tuto quel che l’à patìo co’ to
mama, posso dirghe solo ‘na preghiera.
GIGI
Tra póco, ghe ne sarà du san Nane: pare e fiól.
IOLE (con espressione preoccupata)
Parché?Mórito?
GIGI
Prima o dopo, la ne tóca a tuti. S’el Padretèrno el vól tegnér la soménsa, no credo proprio ch’el pensa a noàltri.
IOLE
Ma stèto mal?
GIGI
Nò, són solo incassà.
IOLE
Me dìsito la verità?...Mi te misuro la pressión.
GIGI
No stà vegnér qua co’ quel stranfér parché, sta òlta, lo buto zó da la finestra.
IOLE
Va ben, ma se te móri, no stà darme la colpa a mi.
6