studiemateriaal eerste termyn: ou testamentiese oorsig die wet en ...

Maar kom ons wees eerlik. Dit wás nie maklik nie, en dit ís nie maklik om God absoluut te vertrou en op sy
Woord te neem nie. God het al hierdie wonderlike beloftes gemaak aan Abraham en Sara en hulle kinders,
en die land en die seëninge wat deur hulle sal kom. Maar die jare rol aan en Sara is steeds nie swanger nie.
Uiteindelik seën God haar met die kind van die belofte. Teen hierdie tyd is Abraham alreeds 100 jaar oud
(21:5).
Abraham se toets van sy geloof bereik ‘n hoogtepunt in Genesis 22, as God aan hom sê om hierdie kind te
gaan offer.
Dit waarvoor die besnydenis gestaan het, die afsny uit jou volk en die afsny van jou nageslag, dit moet
Abraham nou aan Isak voltrek! Hoe kan hy dit doen? Hoe kan hy die vloek van die verbond op hom neem?
Wel? God het Homself mos verbind tot die waarmaker van die verbond. Hy self sal beide die seëndeel
vervul asook die vloek van verbreking!
Dink aan wat Jesus gedoen het! (Rom 8 “eie seun” en Kol 2).
Hoe dit ook al sy, God bevestig sy verbond (Genesis 22:16-18).
GENESIS 25 – 36: ISAK, JAKOB, JOSEF
Vanuit Jakob se seuns kom die 12 stamme van Israel na vore.
Weer eens, alhoewel God se doel in die roeping van Abraham was om seën vir die hele wêreld te bring,
fokus die Bybelse verhaal nou eers weer op die families deur wie die seëning sal kom: dit is die twaalf seuns
van Jakob, wie se families die 12 stamme van die nasie van Israel sou word.
Daar is 3 elemente wat opvallend is in hierdie verhale:
Eerstens sien ons dat God se beloftes aan Abraham herbevestig word aan sy seun en kleinseun, in so ‘n
mate dat daar later na God verwys word as die God van Abraham, Isak en Jakob (Eksodus 3:6).
Lees Genesis 26:1-4
• Jy sal saamstem, Isak moes onder die versoeking wees om elders heen te vlug weens die
hongersnood in Kanaän.
• Wat sien ons? God verskyn aan Isak en sê aan hom om nie na Egipte af te gaan nie, maar om in
die land Kanaän te bly. God verseker Isak dat Hy die land vir hom en sy nageslag sal gee, hulle so
baie soos die sterre sal maak, en dat Hy deur hierdie nasie die nasies van die aarde sal seën.
• Die belofte word herhaal in 26:23-25. Lees dit.
• Met Jakob is dit dieselfde. Jakob, die komplekse karakter wat sy vader Isak bedrieg sodat hý,
eerder as Esau, die eersgeboorte seën ontvang (Genesis 27).
• As gevolg van hierdie bedrog, haat Esau vir Jakob en beplan om hom dood te maak en Jakob vlug
vir sy lewe.
• En tog, ten spyte van sy manipulasie en bedrog, ontmoet God Jakob in ‘n droom by Bet-el. Hy sien
‘n leer tussen hemel en aarde met engele wat op en af klim. Bo staan die Here, wat Homself
identifiseer as die God van Abraham en Isak: “En kyk, die HERE het bo-aan gestaan en gesê: Ek is
die HERE, die God van jou vader Abraham en die God van Isak. Die land waarop jy lê en slaap, sal
Ek aan jou en jou nageslag gee” (Gen 28:14).
Die tweede kenmerk van hierdie stories, veral die van Jakob en Josef, is die herhaalde tema van die bittere
verbreking van familieverhoudings.
• Die vete tussen Jakob en Esau speel self af op ‘n verskeidenheid manier en besoedel die lewens
van hulle kinders ná hulle.
• Josef (voor Benjamin gebore word) is Jakob se bedorwe seuntjie, wat sy broers antagoniseer deur
aan hulle drome te vertel waarin hulle hom dien.
• Die broers verkoop Josef tot slawerny en gee voor aan Jakob dat Josef vermoor is.
• Op al hierdie maniere word die katastrofiese patroon van die breuk in verhouding, wat begin het met
die sonde van Adam en Eva, gemanifesteer – weer en weer – in die “gekose lyn” van die mensdom!
• Hierdie stories wil nie hierdie gedrag goedpraat nie, maar konfronteer ons met die harde werklikheid
omtrent die karakters wat God kies. Gee dit nie vir ons hoop nie?