Laai boek af : PDF

Dit is een van die geliefkoosde tekse wat ‘n mens gebruik as jy met ‘n siel
werk om vir hom te sê: Sien jy, die Here klop aan jou hart. Maak oop jou
hart, die Here het belowe om in te gaan. Maar in werklikheid, die eerste
fundamentele verklaring van daardie teks is nie vir die individu nie, dit is vir
die gemeente, want dit kom voor in die laaste brief, die sewende brief aan
die Laodicense.
Maak u Bybels oop by Openbaring 3. Ek wil net vir u wys, in die Afrikaanse
Bybel is dit so afgemerk, as u by Openbaring 2 begin, is die opskrif daar:
Briewe aan die Sewe Gemeentes van klein Asië: Die eerste brief is aan
Éfese, daarna, by die agtste vers, word die Tweede Brief aan die
Gemeente van Smirna geadresseer, en so gaan hy aan en dan sien ons
dat die sewende brief, Openbaring 3:14, Sewende Brief aan die Gemeente
van Laodicéa is, die louwarm kerk!
Die laaste kerk wat ook tiperend is van die kerktydperk waarin ons vandag
is. Dié kerk wat sal bestaan ten tye van die wederkoms van onse Here
Jesus. Dit is aan hierdie kerk, in hierdie brief, aan hierdie gemeente van
Laodicéa, wat Jesus sê: “Kyk ek staan voor die deur en Ek klop, as iemand
oopmaak, sal Ek ingaan en maaltyd hou met hom en hy met My”.
Laat die mense ons dit maar kwalik neem. Ek bedoel dit op niemand nie,
ek bedoel dit op myself, in my gemeente, net soos enigiemand anders.
Mag God vir ons genade gee dat die Here Jesus nie miskien buite ons
gemeente staan nie.
Buitekant; --- en aan ons eie deur klop en vra om in te kom.
Behoort die Here Jesus dan nie binne-in, die kerk te wees nie?
Hy sê vir die gemeente van Laodicéa: Ek klop aan die deur, maak oop.
Hier is ‘n deel van die redes daarvoor; ons het vir die Here Jesus, die
Heilige Gees, gesê: Gaan staan buitekant. Ons sal ons orde van diens;
ons geleerdheid; ons Skrifverklaring; ons manier van dinge doen, in die
kerk inbring, maar dit en dat staan ons nie aan nie; stem ons nie mee saam
nie; sê ons dit was vir daardie dae; sê ons dit is nie meer goed vir dit of vir
dat nie, ons laat dit nie toe nie.
Die gevolg hiervan het ek baie mooi beklemtoon in die boek wat ek geskryf
het waarin die sewe gemeentes in besonder behandel is. Ek gee vir u die
geskiedenis van elkeen, en ek wys vir u hulle toestand waartydens die brief
aan hulle geskryf is. Ek wys vir u hoedat dit ‘n deel en ‘n prentjie vorm van
die verskillende tydperke dwarsdeur die eeue. Dat baie van God se
Geesgevulde manne met ‘n magtige bediening van God, nie toegelaat
word in ons kerke nie. Hulle sal nooit hulle preekstoel vir hulle gee nie.
71