Vvaerachtighe Beschryvinghe Van drie seylagien, ter ... - Van Wijnen

+Iulij 2.
[Iulij 3]
+ Des sondaeghs den 3. Iulij wast seer claer weder, ende de wint uyt den z.w. doen heeft
Willem Barentsz. den rechten Meridiaen ghesocht in deser manieren.
+.
[fol. 3r]
Nota.
Hy nam der Sonnen hooghte met zijn Graet-boogh, alse zuydoost was, ende vant hem
verheven int zuydtoost 28. ende een half graden, ende hy was al over w. ten n. dat hy noch 28.
ende een half graden boven den Horizont was, also dattet 5. en half streeck scheelde, de selfde
gedeelt, so bleeft noch 2. ende drie vierendeel van een streeck, also dattet Compas 2. ende
drie vierendeel streeck verandert was, gelijck alst bleeck opten selfden dagh, dat de Son op
haer hoochte was tusschen z.z.w. ende z.w. ten z. want de son was al z.w. ten z. dat hy noch
niet ghedaelt was, ende zy hadden 73. graden 6. minuten.
[Iulij 4]
Noch geseylt o. ten n. 4. mylen totten 4. Iulij smorgens, doen wierpense tloot op 125. vaem+
slijckinghe gront, des snachts werdet weder mistich, ende smorghens quam de wint uyten
oosten. Doen seyldense z.o. ten z. 4. mylen totte ooster Son toe, doen wertet loot weder
geworpen, ende hadden gront op 108. vadem, swart slijck. Doen wenden zijt noortwaert over,
ende seylden n.n.o. ende n.o. ten n. ses mylen, tot dat de Son z.z.w. was, ende doen saghen
zijt landt van Nova Sembla, z.o. ten o. van haer 6. oft 7. mylen, daer was grondt op 105.
vadem ende swart slijck.
Doen wendese weer zuydtwaert over, ende seijlden z. ten w. behoudens ses mylen totte
w.n.w. Son toe, daer was de diepte 68. vadem, de gront slijck, als de voorgaende, de wint
zuydt oost.
Daer nae wenden zijt oostwaert over, ende seijlden oost ten zuyden 6. mylen. Doen peijlde
Willem Barentsz. de+ Son den 4. Iulij des nachts met zijn Graedt-boogh, doense opt leechste
was, te weten tusschen het n.n.o. ende o. ten n. ende hy was verheven bouen den Horizont 6.
ende een derdendeel graden, zijn declinatie was 22. graden, 55. minuten, daer af ghetoghen de
ghevonden hooghte, so bleeft noch 16. graden 35. minuten, die ghetrocken van 90, soo bleeft
73. graden 25. minuten. Die gheschiede ontrent 5. oft 6. mylen vant landt van Nova Sembla.
+Iulij 4.
+Nota.
[Iulij 5]
Doen wenden zijt oostwaert over, ende seijlden o. ten z. ende o.z.o. 5. mylen, daer quamen zy
by een laghe+ uytstekenden hoeck, die noemdense Langenes, ende recht aenden hoeck nae't
oosten was een groete baey, daer voerense met het boot aen landt, maer vonden daer gheen
volck.