Vvaerachtighe Beschryvinghe Van drie seylagien, ter ... - Van Wijnen

Caerte vande Saminten ende haer Coninck, van haer gheleghentheyt, cleedinghe ende wesen,
ende van haer sleden, ende tsnel varen der selver, met de Rheeden diese voort trecken, ende
hoe ons volck minnelijck met haer ghesproken, ende daer nae seer vriendelijck vanden
anderen ghescheyden zijn.
[fol. 12r]
gheleghentheyt der Zeevaert daer ontrent, daer van wy naderhandt vanden Saminten verstaen
hebben, dat op Weygats eenighe lieden woonende zijn, ende op Nova Sembla mede, maer wy
hebben daer gheen volck connen+ vinden, noch huys noch yet anders, alsoo dat wy om
breeder bescheyt te vernemen, met sommighe van ons volck noch verder z.o. aen trocken nae
den oever vander Zee. Als wy nu int trecken waren, hebben wy een gemaeckten wech
ghevonden int Mos of Moras, ontrent ter halver knie diep, want alsoo diep tredende vonden
wy harden grondt. Opt alderondiepste wast over de schoenen diep. Als wy nu int voort reysen
aenden oever quamen, soo verblyden wy ons overmidts ons dochte dat wy openinghe saghen,
daer wy wel deur souden comen, om dat wy aldaer so weynich ys saghen. Des avonts te
scheep comende, hebben wy dit voor een nieuwe tydinghe ghebracht. So hadde onse Schipper
mede een roy-jacht uytghesonden, om te sien oft de Tartarische Zee open waer, maer zy
mochten inde Zee niet comen om des ys wille, dan zy voeren aende Cruijs hoeck, ende lieten
de jacht daer liggen, ende liepen over landt nae de tWist hoeck, ende sagen daer dattet ys
vande Tartarissche Zee aende cust van Ruslandt ende de Weygats inde hoeck vol ghestouwt
was.
+Menschen op Weygats wonende.
[Augusti 23]
Den 23. Augusti hebben wy een Lodigie van Pitzore ghevonden, ende was met bast tsamen
ghenaeyet, ende+ hadde noordtwaerdt op gheweest, om aldaer eenige Walrussche tanden,
Traen ende Gansen te becomen, diese tot+ de ladinghe in hadden vande schepen die uyt
Ruslandt comen souden deur de Weygats, also zy ons seyden doen wy haer verspraken, dat
die schepen soude comen om te seylen inde Tartarische Zee, voorby de Reviere Oby, tot een
plaetse ghenoemt Vgolita in Tartarien, om aldaer de winter over te blyven, ghelijckse alle
jaers ghewoon waren te doen. Zy seyden dattet noch 9. oft 10. weecken soude zijn, dattet gat
soude toe vriesen, ende alst begon te vriesen soudet dan stracks toe vriesen, ende datmen dan
over ys mocht loopen tot in Tartarien over de Zee, die zy noemden Mermare.
+Augusti 23.
+Een Lodgie van bast genaeyet ghevonden.
[Augusti 24]
Den 24. smorghens vroech voeren wy de Lodgie aen zijn boort om breeder bescheyt te
vernemen vande Zee+ aende oost zyde vande Weygats, ende hebben ons goet bescheyt
ghedaen als verhaelt is.
+Augusti 24.
[Augusti 25]