AREALDELEN AV KOMMUNEPLANEN 2011-2023

5 PLANOMTALE
Planomtalen skal vere retningsgjevande for vidare utbygging i kommunen. Dette kapittelet
omhandlar ei vurdering av utvalde tema og arealføremål i kommuneplanen.
5.1 Konvertering av arealføremål etter ny plan- og bygningslov
Ny plan- og bygningslov (pbl) har ved denne rulleringa medført konvertering av eksisterande
arealføremål etter gamal pbl til arealføremål etter ny pbl.
Når det gjeld innløyste friluftsområde (som er tilrettelagt), er desse vist som bandlagt etter lov
om friluftsliv i gjeldande plan (2003-2014). Ved konvertering har me valt å vise dei som
eksisterande friområde, då dette er i samsvar med den faktiske bruken av områda.
Når det gjeld næringsareal, har definisjonen av arealføremålet næringsverksemd endra seg.
Etter ny lov omfattar den kontor, hotell/overnatting, bevertning, industri, lager,
bensinstasjon/vegserviceanlegg og anna næring. Etter tidlegare lov, var også forretningar og
kjøpesenter inkludert. Dette er no eigne arealføremål. I tillegg har me fått arealføremålet
sentrumsføremål. Dette medfører ei utilsikta endring av kva verksemd det er opna for i nokre
område. På grunn av dette har vi valt å vise Ostereidet og Lindås senter som sentrumsføremål i
staden for næringsverksemd. Sentrumsføremål opnar for forretningsverksemd.
5.2 Bygningar og anlegg
5.2.1 Bustadområde
Dette kapitlet gjeld areal sett av til bustadføremål etter plan- og bygningslova § 11-7 nr.1.
Utbyggingsstrategien for bustader er fastsett gjennom planprogram og arbeidsmåla i kap.4.2.
Tabellane frå bustadbyggjeprogrammet i kap 3.2.4 viser at det er restkapasitet når det gjeld
bustader i reguleringsplanar, som er vedtekne eller i prosess. Gjennom siling av innkomne
forslag til nye bustadområde har ein difor vore restriktiv i denne kommuneplanen. Innspel om
utbygging som medfører nye ”satellittar” er konsekvent valt bort. Arbeidsmålet om at større
bustadområde skal lokaliserast langs aksane E 39 og RV 57, slik at dei styrker eksisterande senter
(Ostereidet, Lindås og Knarvik/Alversund) har vore førande. Særskild har ein i planarbeidet valt å
prioritere innspel som styrker Lindås som senter, og det er difor sett av høvesvis mykje nytt
bustadareal der.
Det er i framlegget til ny arealdel av kommuneplan for Lindås kommune lagt inn totalt ca. 458
dekar til bustadområde. I samsvar med målsetjingane om å styrke eksisterande senter, er ca.
177 dekar av dette arealet på Lindås i nær tilknyting til senteret og eksisterande busetnad. Lagt
til grunn ein tomtestorleik på gjennomsnittleg 750 m² per bueining, vil dette totalt gje ca. 610 nye
bueiningar i planområdet. Då tek ein med areal som vil verta regulert til grønstruktur, vegareal
og andre tilhøyrande funksjonar i byggjeområda. Når ein legg befolkningsprognosane til grunn
(det er venta ein befolkningsauke på ca. 3000 fram til 2022), og ein veit at ein del av områda
som er sett av til bustadføremål i eksisterande arealdel neppe vert aktuelle å realisere, meiner
vi dette samsvarer godt med behovet.
Det har i denne rulleringa ikkje vore aktuelt å ta ut ubygde område frå planforslaget, sjølv om
dei neppe vil la seg realisere. Dette heng saman med at dette ikkje er skissert i
planprogrammet, og ein ønskjer ein skikkeleg prosess rundt dette, med betre moglegheiter for
medverknad frå dei det gjeld. Gjennomgang av desse områda vil truleg verte tema ved neste
rullering av planen.
37