Letras novas - Asociación de Escritores en Lingua Galega

Aquí na Costa da Morte
Aquí na Costa da Morte, onde os días son grises, depresivos e as noites
negras, longas coma o manto do demo, temos os ollos da cor do mar
baleiro. Ás veces no horizonte vougo nace un facho de esperanza, un raio
verde que morre os poucos segundos no tempo do sal.
Aquí na Costa da Morte escribimos a nosa propia historia coas lágrimas
enferruxadas de salseiros.
Aquí temos un ronsel de pegadas esquecidas polo nordés nas praias,
as areas beben todas as palabras náufragas de sangue mariñeiro.
Aquí temos os ollos de loito por non durmir na morte.
Aquí na Costa da Morte as cruces de pedra viven nos bíos coas flores
de namorar, temos a alma afogada nun inverno perenne.
Aquí nas tabernas da Costa da Morte o alcohol afouto anda sen
rumbo, ceibe polas veas salgadas.
Aquí xogamos a vida na baralla do destino, emborrachámonos de
mar con grolos de temporais.
Aquí o zolás diario cospe ventos sombrizos, crávanse nas entrañas
do amor do mar.
Aquí temos a memoria oxidada para poder chegar ao mañá.
Aquí a música da vida son as calderillas gabeando polos bíos.
Aquí o mar olla famento de alento, de futuro.
Aquí espetouse un cruceiro nun brazo de terra, na cultura das romarías
esquecidas, na memoria dos mostradores.
A miña xeración viviu a festa da morte nunha carballeira de heroína.
Da nada ao todo para fuxir da mágoa da historia.
Cantos compañeir@s navegan defuntos, á valga nun mar de bágoas?
Aquí na Costa da Morte todos queremos esquecer a ferida que nos
desangra o corazón.
Aquí laiamos como gaivotas diante das pedras celtas do mar rouco.
Lémbrome daquel fin de ano, aló polos noventa, cearamos os colegas,
por fin todos xuntos, había anos que o estabamos intentando, foi
cando Manolo trouxera de sobremesa uns cantos gramos de coca.
Os gintónics e a coca animaban a nosa alma de local en local ata
entrar na disco, alí o que máis empezou a moverse ao xeito do ritmo.
Eu arrimei e algo che dixen ao oído, nunca lembro o que foi e tanta
graza che fixera, tiñas presa por bailar comigo, logo na barra eu falaba
91