Gati ose jo? - Saferworld

5
Përfundim
hulumtimi tregon se njerëzit në kosovë po ndihen pakëz më rehat kur
flasin për armët; mirëpo duhet të mbahet në mend se ky ndërrim i vogël vjen prej një
pikë fillestare të ulët, dhe se ende ka hezitim gjerësisht të përhapur për t’u përfshirë
publikisht në çështjet e posedimit të armëve. Ndjenjat e pasigurisë mbeten arsyeja
mbizotëruese se pse njerëzit dëshirojnë t’i kenë armët e veta. Si rezultat i kësaj, aktualisht
ekziston një skepticizëm i përgjithshëm lidhur me gjasat e një nisme për grumbullimin
e armëve në Kosovë, dhe te shumë serbë të Kosovës, mbizotëron një mosbesim i
thellë. Në të vërtetë, ka pak dëshmi për përvojat pozitive të ndodhura në të kaluarën në
Kosovë të cilave do të mund t’u referoheshim.
Në këtë kontekst, çdo amnisti ose nismë pë grumbullimin e armëve duhet të shqyrtohet
me kujdes, dhe duhet të dizajnohet në kontekstin e një programi më të gjerë të
punës për të përmirësuar sigurinë dhe adresuar në mënyrë të tërësishme çështjet që
në thelb e krijojnë kërkesën për armë. Kontrolli dhe/ose grumbullimi i armëve të paligjshme
është projekt shoqëror dhe për këtë qëllim, shoqëria e Kosovës duhet të zhvillojë
një debat gjithëpërfshirës dhe serioz se çfarë lloj regjimi për armët vërtet dëshiron.
Një projekt i planifikuar dobët dhe jofleksibil i grumbullimit vetëm sa e rrezikon atë,
duke e bërë më të vështirë për udhëheqësit e Kosovës fillimin e sjelljes nën kontroll të
posedimit të armëve nga civilët.
Shpallja e pavarësisë në shkurt të vitit 2008 mund t’u japë autoriteteve të Kosovës mundësinë
që të bindin shumicën shqiptare të Kosovës se tani është koha e duhur pë dorëzimin
e armëve të tyre të paligjshme, por në të njëjtën kohë ajo paraqet sfidë që procesi
të fitojë besimin dhe përkrahjen e serbëve të Kosovës. Në këtë kontekst, nevojitet
një qasje feksibile dhe specifike vendore, ndërkaq duhet të caktohen qëllime realiste
për çdo nismë që ka të bëjë me armët në të ardhmen. Në fund, populli i Kosovës nuk
dëshiron të jetojë në një shoqëri kur armët e paligjshme janë gjerësisht të përhapura
dhe përdorimi i tyre vazhdon t’i dëmtojë civilët e pafajshëm. Megjithatë, për sa kohë
njerëzit ndjehen të pasigurt për shkak të frikës nga krimi dhe agresioni, do të jetë
shumë e vështirë që ata të binden që t’i dorëzojnë armët e tyre, pavarësisht stimujve të
paraqitur.