Y e d d i n c i k i t a b

vurulan bütün zərbələrə baxmayaraq, iki il bundan öncə biz Ermənistanla Azərbaycan arasında müharibəni, atəşi
dayandırmışıq.
1988-ci ildən Ermənistanın Azərbaycana qarşı başladığı təcavüz nəticəsində biz böyük itkilər vermişik,
çox şəhidlər vermişik, gənclərimizin bir çoxu bu müharibədə özlərini qurban veriblər. Bunların nə demək
olduğunu siz, almanlar bəlkə də hamıdan yaxşı bilirsiniz. Məsələn, indi mənə tərcüməçilik edən, alman dilini
yaxşı bilən Azərbaycan professoru Çərkəz Qurbanlının oğlu 1994-cü ildə torpaqlarımızı müdafiə edərkən 26
yaşında şəhid olubdur.
Ancaq bütün bunlara baxmayaraq biz Ermənistanla sülh yaratmaq, münaqişəni sülh yolu ilə aradan
qaldırmaq istəyirik. Bundan ötrü də çox konstruktiv addımlar atırıq. Biz ədalət tələb edir və məsələnin ədalətlə
həll olunmasını istəyirik. [28-29]. Ədalət də ondan ibarətdir ki, Azərbaycanın işğal edilmiş bütün torpaqları azad
olunmalı, Ermənistanın işğalçı qüvvələri Azərbaycanın ərazisindən qeyd-şərtsiz çıxmalıdır. Azərbaycanın ərazi
bütövlüyü, sərhədlərinin toxunulmazlığı bərpa olunmalıdır. Bu, adicə beynəlxalq hüquq normalarının tələbidir.
Biz heç bir ölkənin torpağına göz dikmirik, amma öz torpağımızın da bir metrini belə heç kəsə verə bilmərik.
Biz bu şərtlər daxilində Ermənistanla danışıqlar aparır və münaqişəyə sülh yolu ilə son qoymaq istəyirik.
Amma bütün bu problemlərə baxmayaraq, müstəqil Azərbaycan Respublikası öz müstəqillik yolu ilə
çox inamla .gedir. Biz Azərbaycanda hüquqi demokratik dövlət qururuq. İqtisadiyyatımızı bazar iqtisadiyyatı
prinsipləri əsasında dəyişdirir, mülkiyyətin özəlləşdirilməsi proqramını sürətlə həyata keçirir, sərbəst
iqtisadiyyat, təşəbbüskarlıq, azad sahibkarlıq prinsiplərini bərqərar edirik. Bu prinsiplər əsasında dünyanın
bütün ölkələri ilə qarşılıqlı surətdə faydalı əlaqələr qururuq. Azərbaycanın təbii sərvətlərindən, böyük iqtisadi
potensialından müştərək istifadə olunması üçün dünyanın şirkətləri ilə iş görməyə hazırıq və bu sahədə
müəyyən nailiyyətlər əldə etmişik. Azərbaycanın zəngin neft və qaz yataqlarından istifadə olunması üçün
dünyanın – Amerikanın, Avropanın iri neft şirkətləri ilə 1994-cü, 1995-ci illərdə və nəhayət, bu il, 1996-cı ildə
böyük müqavilələr imzalamışıq və bunlar həyata keçirilir. Azərbaycan iqtisadiyyatının bütün başqa sahələrində
də xarici ölkələrlə, şirkətlərlə müştərək iş görmək üçün böyük imkanlar var: biz bunu dünyaya bəyan etmişik və
mən bu gün sizə bir daha deyirəm ki, Azərbaycan dünya sərmayəçiləri üçün, müştərək iş görmək üçün açıqdır.
Bu baxımdan biz Almaniya ilə iqtisadi əlaqələri genişləndirməyə çalışırıq və sabah, sonrakı günlərdə
ölkənin dövlət, hökumət rəhbərləri, böyük şirkətləri ilə bu barədə konkret danışıqlarım olacaqdır. Biz
Almaniyanı özümüz üçün çox dəyərli tərəfdaş hesab edir və bütün sahələrlə əməkdaşlıq etmək istəyirik. Bizim
qapılarımız açıqdır.
Bilirsiniz ki, bu ilin aprelində Azərbaycan Avropa Birliyi ilə əməkdaşlıq haqqında saziş imzalayıbdır.
Bir həftə bundan öncə Strasburqda Azərbaycan xüsusi qonaq statusu ilə, yəni namizəd şəklində Avropa Şurasına
qəbul olunubdur. Bunlar hamısı Azərbaycanın Avropaya mənsub olduğunu, eyni za[29-30]manda
Azərbaycanda dövlət quruculuğunun, cəmiyyətimizin artıq Avropa standartlarına uyğun olduğunu göstərir.
Keçən il ümumxalq referendumu vasitəsilə Azərbaycanın ilk konstitusiyasını qəbul etdik, demokratik
seçkilər nəticəsində, çoxpartiyalılıq prinsipi əsasında Azərbaycanın ilk parlamentini seçdik. Azərbaycanda 30-
dan çox partiya, o cümlədən bir çox müxalifət partiyaları fəaliyyət göstərir. Ölkəmizdə mətbuat azadlığı, siyasi
plüralizm tam bərqərar olmuşdur. İnsan hüquqlarının qorunması Azərbaycan dövlətinin əsas prinsiplərindən
biridir. Bunlar hamısı onu nümayiş etdirir ki, Azərbaycanın Almaniya ilə sıx əməkdaşlıq etməsi üçün bütün
sahələrdə əsaslar yaranıbdır.
Bu baxımdan Almaniya-Azərbaycan forumunun yaranmasını çox əlamətdar hadisə hesab edirəm. Bizim
çox ehtiyacımız var, xüsusən Azərbaycan həqiqətlərini dünyanın bilməsinə, o cümlədən Almaniyanın hər
yerində bilinməsinə ehtiyacımız var. Təəssüflər olsun ki, Azərbaycan həqiqətləri dünyada hələ ki, olduğu kimi
məlum deyildir. Biz çalışırıq ki, özümüzü olduğumuz kimi tanıdaq. Çalışırıq ki, Azərbaycan, xalqımız
haqqında, ölkəmizdə gedən demokratik proseslər, iqtisadi dəyişikliklər haqqında bütün ölkələrdə dolğun
təsəvvür olsun. Ona görə də Almaniya-Azərbaycan forumunun imkanlarına ehtiyacımız çoxdur. Ümidvaram ki,
siz Almaniya ilə Azərbaycan arasında olan əlaqələrin daha da genişlənməsi, inkişaf etməsi və möhkəmlənməsi
üçün çox iş görə bilərsiniz və arzu edirəm ki, çox iş də görəsiniz. Biz bunun üçün öz tərəfimizdən əlimizdən
gələni edəcəyik. Cənab Keslerin dediyi kimi, istərdik ki, sizin forum Azərbaycan üçün Almaniyada güclü bir
lobbiyə çevrilsin. Ümidvaram ki, belə də olacaqdır.
Almaniya komandasının Avropa futbol çempionatında qalib gəlməsi münasibətilə sizi ürəkdən təbrik
edirəm. Dünyanın futbol həvəskarları dünən Londonda keçirilən bu futbol matçını çox böyük maraqla
izləyirdilər. Azərbaycanda da futbol həvəskarları çoxdur və ölkəmizdə də futbol matçına televiziya ilə çox adam
baxıbdır, o cümlədən mən də həmin oyunu televiziya ilə əvvəldən axıradək seyr etmişəm. Matçın birinci
yarısında çox narahat idim, çünki ilk qolu çexlər vurdu[30-31]lar. Oyunun sonuna 25 dəqiqə qalanadək vəziyyət
belə idi. Mən narahat idim ki, birdən almanlar uduzarlar, sonra da məyus olarlar, bizim də buraya səfərimiz
yaxşı olmaz. Ona görə oyunu hər saniyə izləyirdim. Matça oğlumla birlikdə baxırdım. O məni sakit edirdi ki,
narahat olma, almanlar udacaqlar. Bu söhbətimizdən bir neçə dəqiqə sonra almanlar birinci qolu vurdular. Biz
ikimiz də əl çaldıq. Amma London stadionundakı almanlar o qədər əl çalırdılar ki, bizim əl çalmağımızı heç kəs
eşitmirdi.
20