2 - мгимо

ТЕКСТ №1
NCHI YETU NA WANANCHI
Nchi ya Tanganyika ipo katika Afrika ya Mashariki, kati ya
Maziwa matatu makubwa ya Afrika na Bahari ya Hindi. Ipo kusini
kidogo tu ya Mstari wa Ikweta. Nchi zilizo jirani (1) na nchi yetu ni
Kenya, Uganda, Rwanda, Burundi, Kongo, Zambia, Malawi na
Msumbiji.
Mashariki mwa nchi ya Tanganyika kuna visiwa viwili
vinavyotuhusu sana. Visiwa hivyo ni Zanzibar na Pemba ambavyo
vyote pamoja kama kawaida hutajwa kwa jina moja tu yaani Zanzibar
au Unguja.
Tanganyika na Unguja ni nchi jirani kwa jiografia, historia,
lugha, mila, tabia na siasa. Kwa hivyo siku fulani wananchi wa
Tanganyika na Unguja waliamua kuungana na kuwa nchi moja.
Tarehe 22 Aprili mwaka 1964, Rais wa Jamhuri ya Tanganyika,
Mwalimu Julius K. Nyerere, na Rais wa Jamhuri ya Watu wa Unguja
na Pemba, Sheikh Abeid Karume, walitia saini Hati ya
Muungano kati ya nchi zao mbili. Chini ya Hati hiyo Tanganyika na
Unguja zikawa nchi moja. Sherehe kubwa ilifanyika tarehe 27
Aprili, 1964, katika Jumba la Karimjee mjini Dar es Salaam ya
kubadilishana Katiba za Serikali na kuanzisha Serikali mpya yaani
Serikali ya Jamhuri ya Muungano wa Tanzania. Jina la “Tanzania”
lilichaguliwa na Baraza la Mawaziri kutokana na majina yaliyoletwa
kwa ajili ya mashindano ya kuchagua jina la Jamhuri ya Muungano.
Linatokana na “Tan-”, mwanzo wa neno “Tanganyika” na “Zan-”,
mwanzo wa neno “Zanzibar” na “-ia” mwishoni ili kulipa jina hilo
jipya umbile la Kiswahili. Basi Taifa jipya lilizaliwa siku hiyo.
Tukitaja sehemu ya Tanzania inayohusu Tanganyika husema
“Tanzania bara”, na ile sehemu ya Unguja na Pemba huitwa “Tanzania
visiwani”.
Eneo la Tanzania bara huchukua kilomita za mraba kiasi cha
laki tisa na arobaini elfu. Na sehemu yake ya visiwani haichukui
eneo kubwa, yaani kilomita za mraba elfu mbili na mia sita tu.
Sehemu kubwa ya eneo la nchi yetu imefunikwa kwa maji ya
maziwa. Miongoni mwa maziwa hayo ni Rukwa, Nyasa, Manyara,
Natron, Jipe, Victoria na ziwa Tanganyika.
5