Jahresbericht 2006 - Spital Oberengadin

Rapport da la Cumischiun da l’ospidel per l’an 2006
Remarchas generelas
In occasiun da la votaziun circuitela dals 26 november
2006 chi ho gieu lö seperedamaing in mincha
vschinauncha es gnida accepteda cun granda magiurited
la ledscha reguard l’Ospidel d’Engiadin’ota e la
Dmura per attempos e chesa da fliamaint Promulins.
Quella es entreda in vigur als 1. schner dal 2007. Cun
quista ledscha s’ho s-chaffieu la basa leghela per
metter l’Ospidel e la Dmura per attempos e chesa da
fliamaint suot üna direcziun cumünaivla. La direcziun
superiura d’amenduos instituziuns ho da nouv la
Cumischiun per l’ospidel e la dmura per attempos e
chesa da fliamaint. Grazcha a l’organisaziun nouva e
fand adöver da sinergias dess esser pussibel da spargner
ulteriuors cuosts. Quista ledscha pussibiltescha
dad integrer ulteriuras spartas dal sectur da sandet
sainza fer müdamaints.
L’Ospidel d’Engiadin’ota ho il status dad ün ospidel
regiunel, cumbain ch’el es zieva l’ospidel centrel
“Spitäler Chur” il pü important ospidel dal chantun
Grischun ed ho dad accumplir incumbenzas schlargedas.
L’Ospidel d’Engiadin’ota es respunsabel pel
provedimaint medicinic da ca. 17000 persunas. Causa
il turissem ho el pü inavaunt da metter a dispusiziun
ressurzas pel provedimaint medicinic dad almain
120›000 persunas. Que do divers giasts chi nu
tschernan lur destinaziun da turissem be seguond la
spüerta turistica, dimpersè eir in basa dad ün provedimaint
medicinic chi funcziuna bain. Que fo grandas
pretaisas taunt a l’infrastructura scu eir al persunel.
L’Ospidel d’Engiadin’ota sto davaunt grandas lavuors
da mantegnimaint e da renovaziun. Dal 2006 s’ho
cumanzo culla sanaziun da las selas d’operaziun. A
s’ho gieu da müder our las fnestras e da renover la
ventilaziun. Per tgnair la chesa sül bun stedi actuel
stöglian gnir fattas ulteriuras investiziuns. Uschè s’ho
da cumprer ün MRI, da saner las chesas pel persunel
e da rimplazzer differentas apparaturas medicinicas,
chi nu correspuondan pü a las pretaisas dal temp. Eir
l’EDV dvainta adüna pü important e cuosta bger.
Il servezzan da salvamaint (Servezzan da salvamaint
d’Engiadin’ota) es gnieu separo da l’ospidel. Ils
duos servezzans da salvamaint, quel chi gniva mno
da l’Ospidel d’Engiadin’ota e l’oter chi suottastaiva
a la Clinica Gut, sun gnieus integros in üna societed
simpla. La collavuraziun traunter il Servezzan da
salvamaint d’Engiadin’ota, la Clinica Gut e l’Ospidel
d’Engiadin’ota funcziuna fich bain.
Quint annuel 2006
L’incumbenza da prestaziun actuela correspuonda a
las pretaisas da la regiun da l’Ospidel d’Engiadin’ota.
Per persunas culla sgüraunza da basa vegnan pajedas
las contribuziuns chantunelas in fuorma da pauschelas
per cas, v.d. cha quellas as drizzan seguond
il möd da trattamaint e na seguond il temp da trategn
a l’ospidel. Ils cas sun creschieus dal 2006 per
3.84 pertschient. Que sun 121 cas staziunaris e 490
ambulants. Ils cuosts da gestiun s’amuntan ad arduond
41 milliuns francs. Il richev da las prestaziuns
medicinicas, da fliamaint e terapeuticas importa var
28 milliuns francs. Il Chantun e las vschinaunchas
dal Circul pejan circa 13 milliuns francs vi da la gestiun
e las investiziuns da l’ospidel. Dal 2006 haun
gieu da sburser las vschinaunchas 1420000 francs
vi da la gestiun da la chesa. Que sun circa 1000000
francs damain cu büdschetto. Causa cha’l chantun
Grischun peja pel mantegnimaint e per la renovaziun
da quella be pü üna pauschela d’investiziun dad
1›180›000 francs, haun gieu da surpiglier las vschinaunchas
dal 2006 contribuziuns d’investiziun in
l’import da 4650000 francs. Pü inavaunt s’ho stuvieu
restituir al Chantun 1015000 francs per persunas
cun sgüraunzas supplementarias.
In basa da la planisaziun a mezza vista vare-
gian las vschinaunchas da pajer düraunt ils ans dal
2007 – 2013 contribuziuns da gestiun traunter 1.3
e 2.7 milliuns francs. Tar las investiziuns saregian
que traunter 1.5 e 7.3 milliuns francs. In totel fo que
minch’an pellas vschinaunchas imports traunter 4.3
ed 8.7 milliuns francs.
Persunel
Seguond la ledscha da l’Ospidel circuitel d’Engiadin’ota
dals 1. december dal 1996, valabla fin als 31 december
dal 2006, eira il landamma ex uffizi president da
la Cumischiun da l’ospidel. Quist uffizi es sto affido
dals 1. gün dal 1997 fin als 31 lügl dal 2006 a vegl
landamma Reto Filli. Düraunt il temp d’uffizi da vegl
landamma Reto Filli s’ho in speciel sano l’ospidel e
fat las lavuors preliminarias per reunir l’Ospidel
d’Engiadin’ota e la Dmura per attempos e chesa da
fliamaint Promulins. Pü inavaunt s’ho eir gieu da
trer decisiuns da persunel per part dischagreablas.
La Cumischiun da l’ospidel ingrazcha a vegl landamma
Reto Filli per sieu ingaschamaint da bgers ans a
favur da l’ospidel.
Als 1. schner dal 2006 ho surpiglio sar Sigi Asprion
la direcziun da l’Ospidel d’Engiadin’ota e s’ho vivieu
aint fich svelt in sia nouva incumbenza, cumbain
ch’el vain d’ün’otra branscha.
La Cumischiun da l’ospidel ingrazcha als meidis da
la chesa ed a la direcziun da l’ospidel per la buna
collavuraziun scu eir a tuottas collavuraturas e tuots
collavuratuors per lur lavur na adüna facila. A tuots
vo ün sincer grazcha fich per lur ingaschamaint instancabel
a bön da la populaziun da nos Circul e da
noss giasts.
r a p p o r t d a l a c u m i s c h i u n d a l’ o s p i d e l p e r l’ a n 2 0 0 6