Editorial

BORCHERT – Of se woll ’n rosa Hemd anhett?
Kann se nich, du, kann se heel un dall nich. Süksen dragen rosa. Dat
weet ik wiss, mien Jung. Timm wurr rein hevig dorbi, as he dit see. Un
de dor tegen hum satt, meende, du kennst dor woll ene van?
Timm see nix. Se satten dor, un dat Gelänner van de Brügg was iesig
unner de dörsleten Büxen. Do see Timm:
Nee, ik nich. Man ik hebb maal een kennt, de harr ene mit ’n rosa Hemd.
Bi ’t Kommiss.
In Russland. In sien Breevtaaske harr he immer so ’n Stück rosa Tüüg.
Man dat leet he nüms sehn. Man eenmaal full hum dat up de Grund. Un
do hebben all dat sehn. Aber seggt hett he nix. Man he kreeg ’n puterrode
Kopp. So as dat Stück Tüüg. Heel rood-rosa. ’savends hett he mi
denn vertellt, dat he ’t van sien Bruud harr. As ’n Talisman, musst du
weten. All hör Hemden sünd rosa, hett he seggt. Un dorvan is dit.
Timm hull up.
Is ‘t dat all? froog de anner.
Do see Timm heel sacht: Ik hebb hum ’t wegnomen. Un denn hebb ik ’t
hoogholln. Un wi hebben lacht. Un wat de dor för Spröökjes bi maakt
hebben, dat kannst di ja woll denken.
Un wieder? froog de, de tegen Timm satt.
Timm keek up sien Knejen. He hett dat wegsmeten, see he. Un denn
keek Timm de anner an: Tja, see he, he hett ’t weggoit, un denn hett
hum ’t raakt. De anner Dag is he al fallen.
Nu wassen de beiden still. Se seten dor man so un seen nix. Man denn
see de anner: Kwetelee. Un denn see he dat noch ’nmaal. Kwetelee,
see he.
Ja, ik weet ’t, see Timm. Seker is dat Rödeleee un dumm Tüüg. Wiss is
dat so. Dat weet ik ok. Un denn see he noch: Aber raar is ’t doch, dat
musst du ok doch seggen, raar is ’t doch man.
Un Timm lachde. Se lachden beide. Un Timm mook in sien Büxentaaske
en Fuust. Un dorbi knüllde he wat tosamen. En lüttjet Stück rosa
Tüüg. Vööl rosa was dor nich mehr an to sehn, he harr dat al so lang in
sien Taaske. Man ’t leet noch rosa. He harr ’t ut Russland mitbrocht.
30
Quickborn408-1.Korr. 30
22.12.2008, 11:35 Uhr