Editorial

Jümmers krank un nich eenmal doot – BULLERDIEK
Klock ölven wöör de Musikpries von de Stadt Bevensen vergeven, un
twoors dubbelt: an de Grupp “Lorbass” ut Gelting un an Jan Graf ut
Krummbek. Jens-Peter Müller hett de Loffreed op “Lorbass” holen un
seggt, dat de Grupp noch na twintig Johrn in desülvige Besetzung spelen
un ok noch jüst so klingen dä as vör twintig Johrn – wo ick mi fraagt
heff, wat dat en Loff is.
För Jan Graf weer dat en “Heimspeel”, denn he is in Bevensen to School
gahn. Sien Schoolmester hett em dor in de Big Band snackt un bi de
Schützen hett he “dat Piepen” lehrt. De schöne Laudatio hett Wolfgang
Rieck holen.
Beide Priesdräger hebbt wunnerbor musizeert. So weer dat en goden
Utklang von de Bevensen-Dagfohrt.
“Jümmer krank un nich eenmal doot” – dormit kunn ok de Dagfohrt
meent ween, heff ick seggt, un mi is bang, de kunn nich so taag ween
as de Spraak. Wat gifft’ to meckern?
1. So wenig Lüüd as dit Johr weern noch nie dor. Jeder dor in Bevensen
kann wohrschienlich en Reeg Lüüd optellen, op de he oder se
sick freit hett, man de nich dor weern. Hett dat doran legen, dat de
Lüüd dat to swoor weer, sick sülfst en Hotel to söken?
2. Meist all Lüüd, de in Bevensen en Optritt harrn, sünd blots för den
Optritt kamen. Mit all harrn wi geern snackt; mit all harrn wi an’n
Abend geern en Beer drunken. Man de weern al weg. Villicht schull
de Vörstand all Referenten dat seggen, dat sick de Tagung freien
wöör, wenn se möglichst bi de ganze Dagfohrt mitmaken wöörn.
3. De Priesvergaav an’n Sünndag ohn Sekt oder Mineralwater, ohn Blomenschmuck
för de Bühn un Blomen för de Priesdrägers leet doch
bannig schraag. Wenn dor dusende Euro för den Pries sünd, schull
dor nich tominnst hunnert för Blomen ween? Man wohrschienlich
liggt dat nich an’t Geld, man doran, dat dor nüms an dacht un sick
verantwortlich föhlt hett. Man dat is noch leger.
Quickborn408-1.Korr. 39
22.12.2008, 11:35 Uhr
39