Stellenbosch Magazine July 2021

die wyse waarop jy hardloop, hoe jy kompeteer
en hoe jy mense behandel.”
Dit is om dié rede dat I2B, wat fokus op
jeugontwikkeling deur afrigting en mentorskap,
deur die twee broers in 2010 begin is.
Fanie vertel dat daar baie uitdagings tydens
die COVID-19-inperkings was, maar hulle is
weer op dreef en sien uit na die projekte wat
voorlê.
“Ons beoog om ons twee bene, Action Sport
en Atletiek vir mense met gestremdhede, te
verbreed en geleentheid vir ’n afrigter - Erik
de Villiers, wat vir jare lank al ’n getroue vrywiliger
by ons is – te gee om ’n rugby- en
krieketprogram deur I2B by behoeftige skole
bekend te stel. Ons is ook besig met die uitbreiding
van die I2B Skate Park en wil dit so
inrig om ook daar ’n vaardigheidsontwikkelings
program aan te bied. Hierdie nuwe programme
kort egter heelwat finansiering om dit lewensvatbaar
te maak. Deur individuele sessies by
my te bespreek ondersteun ’n mens ook
indirek vir Inspired2become.”
Buiten die opwinding van hierdie projekte vind
Fanie ook bevrediging in elke ander aspek
van sy lewe saam met Jenny, sy lewensmaat.
Hulle het mekaar in 2009 ontmoet, maar dit
was eers later dat die vlam van liefde al hoe
helderder begin brand het. “Ek onthou dit
was net voor die atletiek-wêreldkampioenskap
waartydens Usain Bolt sou deelneem. Ek
en ’n vriend moes dringend iemand kry met
DSTV, want as koshuisbrakke het ons nie
daai luukshede gehad nie, en toe soek ons
iemand met ’n TV wat DSTV het.” Jenny
vertel verder: “Op daardie stadium het ek in
Stellenbosch by my ouers gebly. My vriendin
het by my oorgeslaap en sy was goeie pêlle
met sy vriend. So, dis hoe hulle by my huis
opgedaag het.”
“So, vriende van vriende,” sê Fanie. Jenny
glimlag. “Ja, vriende van vriende. So, toe
klop hulle daar aan en toe kyk ons maar
‘‘Die drie
Paralimpiese
Speles was die drie
hoogtepunte van
my loopbaan’’
die race en daai aand het Usain Bolt die
rekord gebreek wat nou nog staan. Vir hom
as atleet is dit dus baie spesiaal dat dit die
manier is hoe ons ontmoet het, maar daar
was toe nog geen vuurwerke tussen ons nie.
Ons het mekaar van tyd tot tyd raakgeloop
oor die jare heen en toe twee jaar terug het
gemeenskaplike vriende ons oorgenooi vir
’n pizza-aand en die res is, soos hulle sê,
geskiedenis.”
Soos baie weet, het Fanie en Jenny nie ’n
tradisionele troue gehad nie. Ook die aanloop
daartoe was vreemd, aangesien hulle apart
gebly het tydens Vlak 5-inperkings verlede
jaar. Jenny het by haar ouers gebly omdat
sy nog heeltyds moes werk, terwyl Fanie
vrywilligheidsdienste by Stellenbosch Unite
wou doen. “Dit sou moeilik vir my gewees
het om ook te help, hoewel ek graag wou,
maar dit was die besigste tyd in die jaar
by die werk. Daardie vyf weke het soos ’n
ewigheid gevoel,” sê Jenny maar verduidelik
dat hierdie tyd van skeiding nie tussen hulle
kon kom nie.
“Ons het “ge-Zoom” vir ten minste ’n uur
elke dag. So, aan die een kant het dit
eintlik ons verhouding baie verdiep. Ons het
ook ’n virtuele date gehad waar ons albei
netjies aangetrek het. Hy het vir my kos
bestel wat hulle by my kom aflewer het,
tesame met ’n geskenkie. So, toe sit ek
daar by my ouers se huis met mooi liggies
wat ek opgesit het en ek het mooi aangetrek
en aan sy kant het hy kos gemaak. Dit was
net te spesiaal.”
Fanie voeg by: “Ek dink ook dit was ’n
maak-of-breek-tyd waar jy weet dat dié tyd
gaan getuig van wat werklik aangaan in die
verhouding. Ek het nie die geskenk vooraf
gesien nie en met die aflewering moes hulle
sê wat hulle daar het, en toe is dit ’n goue
hartjie. So, vir Jenny is ’n goue hart amper
haar simbool van purity.”
50 | Stellenbosch Magazine | July Issue