DIE UITWERKING VAN SKOOLKULTUUR EN -KLIMAAT OP ...

2.2.4 Die makrosisteem
20
Hoofstuk 2: Skoolkultuur en -klimaat: ’n teoretiese begronding
Die makrosisteem bestaan uit die ideologieë, waardes, wette, regulasies, gebruike
en hulpmiddels van ʼn gegewe kultuur (Keenan, 2002:31). Die makro-sisteme waarin
ʼn mens leef, beïnvloed met ander woorde die omvang van verhoudings. Kamerman
(2000:98) is van mening dat die prioriteit wat die makro-sisteem aan die kinders se
behoeftes verleen, die ondersteuning van die binnesirkels in die omgewing affekteer.
Byvoorbeeld, in lande waar daar hoë standaarde vir kindersorg is en waar daar
goeie werkplekvoordele vir werkende ouers is, sal kinders waarskynlik gunstige
ervarings in hulle onmiddellike omgewings, soos die gesin en die skool, ervaar.
2.2.5 Die chronologiese sisteem
Volgens Bronfenbrenner (Berk, 2003:29) is die omgewing wat kinders affekteer nie ʼn
statiese mag nie. Inteendeel, daar is gedurige veranderinge wat plaasvind. Dié
sisteem omvat met ander woorde die dimensie van tyd soos dit in verband met die
ontwikkeling van die kind gebring kan word. Wanneer belangrike ontwrigtende
gebeurtenisse soos ʼn ekonomiese depressie en politieke veranderinge plaasvind,
kan dit ʼn invloed hê op hoe mense op die spanningsvolle situasies gaan reageer.
Uit bogenoemde bespreking van die bio-ekologiese teorie is dit duidelik dat hierdie
teorie ʼn rol kan speel in die studie van skoolkultuur, -klimaat en -geweld. Dié teorie
gaan as ʼn basis gebruik word om die onderlinge verhouding tussen die individu, die
veelvoudige omgewings en die verbintenis met skoolkultuur en skoolklimaat te
illustreer.
2.3 ORGANISATORIESE KULTUUR
Alvorens skoolkultuur bestudeer word, sal daar eers na organisatoriese kultuur as
agtergrondstudie vir skoolkultuur gekyk word.
Die term kultuur word deur antropoloë gebruik om gemeenskappe wat ten opsigte
van gebruike soos kleredrag, dieet, taal en oortuigings verskil, te beskryf. Die term
organisatoriese kultuur is ontwikkel om organisasies ten opsigte van hulle
besluitnemingsprosesse en hulle dag tot dag funksionering te beskryf (Gonder,
1994:15). ʼn Organisasie ontwikkel ʼn spesifieke kultuur oor ʼn lang tydperk. Dit
verteenwoordig ʼn groep mense se gedeelde begrip en verstandhoudings oor hoe